विमान दुर्घटनाय् खुम्हं सित
विमानया कुचा व क्षतविक्षत लासत लुल
येँ (सन्ध्या टाइम्स)/बाग्लुङया बोवाङ गाविस वडा नं. ९ चौधुल धइगु लागाय् म्हिगः बहनी दुर्घटना जूगु नेपाली सेनाया विमानय् च्वनावंपिं खुम्हं मनूतय् लास व कुचा कुचा जुयाच्वंगु विमान लूगु दु। दुर्घटनास्थलय् प्रहरीया पुचः थौं वंगु चान्हय् १ बजे थ्यंगु खःसा अन खुम्हेसियां सीम्ह लूगु खः। प्रहरीं घटनास्थलय् सेनानी दिवाकर कार्कीया म्हसीका पौ, जहाजया कुचा कुचा व प्यम्हेसिया लास क्षतविक्षत अवस्थाय् चान्हय् हे लुइकूगु खः ।
इपिं मध्ये छम्ह मिजंयात जक म्हसीकेफुगु अवस्थाय् दु।
म्हिगः बहनी साढे ६ बजे नेपालगञ्ज विमानस्थलं येँया नितिं ब्वया वःगु उगु विमान दुर्घटना जूगु खः। उकी लानाः विमानया चालक विकास सिंह राठौर व दिवाकर कार्की नापं सह सेनानी डा. रविता पाठक (येँ), सिपाही मिलन गोतामे (ख्वप), नापं सिपाही केशव एडी (बैतडी) व वय्कःया दाजु राम एडी सीगु खः ।
वंगु चान्हय् उद्धारया नितिं ब्वया वंगु नेपाली सेनाया नाइटभिजन हेलिकप्टर नं अन ख्वातुक्क हे खसु दुगुलिं अवतरण याये मफयाः लिहां वयेत बाध्य जूगु खः।
नेपालगञ्जं ब्वःगु नेपाली सेनाया आरएएन ४९ बीएन २ टी विमान म्हिगः बहनी थ्यंमथ्यं सवा सात बजेपाखे बाग्लुङय् दुर्घटना जूगु खः ।
नेपालगञ्जया श्री नं. ४ पिल्ड गुल्मय् उपचारया नितिं भर्ना जूपिं केशवसिंह एरी व सिपाही मिलन गोतामेयात थप उपचारया नितिं येँया छाउनीस्थित वीरेन्द्र सैनिक अस्पतालय् वासः याकेत हयाच्वंगु इलय् लँय् तुं उगु विमान दुर्घटना जूगु खः। उगु विमानलिसे ७ बजे जुयाः ५ मिनेट वंगु इलय् टावरनाप सम्पर्क बिच्छेद जूगु खः ।
बाग्लुङया सदरमुकामं ३६ कोश पश्चिमपाखे पहाडय् विमान दुर्घटना जूगु खः। दुर्घटना जूगु इलय् तसकं सः वःगु नापं विमान च्याःगु खँ नं स्थानीय मनूतय्सं धाःगु दु ।
