वृहत् न्हूदँ समारोह समिति स्वन

येँ (सन्ध्या टाइम्स)/नेपाल संवत् ११३२ न्हूदँ न्यायेकेत थुगुसी नेवाःतय्गु राष्ट्रियस्तरया न्हूदँ समारोह समिति गठन याःगु दु। थौं सुथय् न्हूदँ समारोह संयोजन पुचःया ग्वसालय् जूगु भाषासेवीपिनि मुँज्यां नेपालभाषा व नेपाल संवत् आन्दोलनया न्ह्यलुवा भाजु पद्मरत्न तुलाधरया नेतृत्वय् २४२ म्ह दुजः दुगु 'नेपाल संवत् राष्ट्रिय न्हूदँ समारोह समिति-११३२' गठन याःगु खः। थ्व समितिइ संयोजन पुचःया ११ म्ह दुजः नापं न्हूदँ समारोह समितिया पुलांपिं नायःपिं २० म्ह, नेवाः आन्दोलनया न्ह्यलुवा व्यक्तित्वपिं ६ म्ह, थीथी जातीय खलः पुचःतपाखें ३५ म्ह, राजनीतिक दलपाखें ४ म्ह, संविधानसभाया नेवाः सभासद्पाखें ३२ म्ह, नेवाः स्वायत्त राज्य मंकाः संघर्ष समितिया घटकतपाखें १० म्ह, थौंया मुँज्याय् उपस्थित जुयादीपिं विशिष्ट भाषासेवी व्यक्तितपाखें ११९ म्ह लिसें नेवाः ज्याकःमि गुथि, विद्यार्थी दबू, ल्याय्म्ह दबू, विराट साहित्य सम्मेलन गुथि, ज्यापु संस्कृति संरक्षण कोष आदिपाखें छम्ह छम्ह प्रतिनिधि दुथ्याकूगु खः ।

वंगु स्वीदँ न्ह्यवंनिसें न्हूदँया लसताय् याना वयाच्वंगु ज्याझ्वःयात हीकाः थुगुसी येँया खुलामञ्चय् न्हूदँया मू ज्याझ्वः यायेगु निर्णय नं जूगु दु। मू ज्याझ्वलय् प्रधानमन्त्रीयात मूपाहां कथं ब्वनेगु ग्वसाः दु।
न्हूदँ हनेगु झ्वलय् न्हापांनिसें पिहां वयाच्वंगु सांस्कृतिक र्‍यालीया बारे धाःसा लिपा निर्णय जुइगु खँ धाःगु दु ।