'सम्मानजनक मखु समानताया आधारय् समायोजन'
येँ (सन्ध्या टाइम्स)/नेपाली कांग्रेसया उपसभापति नापं संसदीय दलया नेता रामचन्द्र पौडेलं माओवादी लडाकूया समायोजन सम्मानया ल्याखं मजुसे समानताया आधारय् जुइ धयादीगु दु। सेना समायोजनया निंतिं न्हापां तह निर्धारण यायेमाःगु व अनं लिपा जक ल्याः क्वःछीमाःगु खँ नं वय्कलं धयादीगु दु ।
गोरखाय् थौं याःगु पत्रकार सम्मेलनय् न्ववासें नेता पौडेलं एकीकृत माओवादी शान्ति प्रक्रियाया नितिं लचक जूगु तर व्यवहारय् धाःसा कार्यान्वयन मयाः धयादिल।
क्यान्टोमेन्टय् कष्टकर जीवन हनाच्वंपिं १९ द्वः लडाकुत हे समायोजन यायेत कांग्रेसयात छु आपत्ति धकाः तःगु न्ह्यसःया लिसलय् नेता पौडेलं क्यान्टोमेन्टय् दुपिं १९ द्वः फुक्कं लडाकु मखुगु नापं दुपिं नं मिखां मखंपिं, अपाङ, मस्त नं दुगुलिं उपिं फुकसितं समायोजन याये फइ मखु धयादिल ।
