संघाराम व बौद्ध भावना केन्द्रय् कथिन दान

येँ (सन्ध्या टाइम्स)/वर्षावास क्वचाःगु लसताय् सोमबार संघाराम भिक्षु तालिम केन्द्रय् पवित्र कथिन उत्सव जुल। दाता चमेली गुरुमां, अनुपमा गुरुमां व उपासक उपासिकापिनिपाखें पवित्र कथिन भिक्षु संघयात लःल्हाःगु खः। उगु विहारय् थुगुसी संघनायक भिक्षु अश्वघोष महास्थविर, भिक्षु दपंकर, भिक्षु उपतिस्स, भिक्षु ध्यानीस्वरपिं च्वनाबिज्याःगु खः। पंचशील प्रार्थना यानाः न्ह्याकूगु उगु ज्याझ्वलय् संघनायक भन्तेपाखें धर्म देसना यानाबिज्याःगु खः ।

बौद्ध विद्वान सुवर्ण शाक्यं विहारया इतिहास नापं आःया गतिविधिया विषयय् परिचयात्मक मन्तब्य बियादीगु खःसा सभासद् भिक्षु आनन्दं ज्याझ्वः न्ह्याकाबिज्याःगु खः। ज्याझ्वलय् उपासक उपासिकापिपाखें स्वीन्याज्वः अस्तपरिस्कार नं दान याःगु खः। ज्याझ्वलय् भिक्षु बोधिसेन, भिक्षु धर्मशोभन, भिक्षु गुणघोषपिं लगायत निसःत्या भिक्षु, भिक्षुणीपिनि उपस्थिति दुगु खः। वर्षावास थ्वहे कतिंपुन्हि कुन्हु क्वचाःगु खः ।

उकथं हे अन्तर्राष्ट्रिय बौद्ध भावना ध्यान केन्द्रय् कर्मस्थानाचार्य म्यानमारं बिज्यानाच्वंम्ह श्रद्धेय ऊ ञाणुज्जोता भिवंश महास्थविर वर्षावास च्वनाः पूवंका बिज्याःगु लसताय् भिक्षु महासंघयात कथिन चिवरदान व २६ क्वःगु वार्षिक उत्सव समारोह वंगु शनिवाः जुल। संघनायक भिक्षु अश्वघोष महास्थविरपाखें शील प्रदान यानाः न्ह्याःगु उगु ज्याझ्वलय् भिक्षु निग्रोधं मंकाः बुद्ध पुजा याकाबिज्याःगु खः ।

केन्द्रया नायः शान्तमान शाक्यं लसकुस यानादीगु उगु ज्याझ्वलय् छ्यांज्ये माणिकमान शाक्यं वार्षिक व कोषाध्यक्ष लक्ष्मी बहादुर सिं (महर्जन) पाखें आर्थिक प्रतिवेदन न्ह्यब्वयादीगु खः। केन्द्रया धर्मानुशासक जुया बिज्यानाच्वंम्ह भिक्षु ज्ञानपूर्णिक महास्थविर व केन्द्रया कर्मस्थानाचार्य सयादो ऊ जाणूज्जोताभिवंश महास्थविरपाखें धर्मदेशना यानाबिज्याःगु खःसा भिक्षु महासंघया अध्यक्ष भिक्षु बोधिसेन महास्थविर व थाइल्याण्डया राजदूत सानिगियाम्पोंसां न्ववानादीगु खः। कथिन दातापिं काजी बहादुर शाक्य, रत्नेश्वरी परिवारपाखें कथिन चिवर दान लिपा मंकाः कथं अष्टपरिस्कार दान बीगु ज्या जूगु खः। सल्लाहकार मोतिलाल शिल्पकारं सुभाय् बीधुंकाः पुण्यानुमोदन यासें ज्याझ्वः क्वचायेकूगु खः ।