पहाडी सभासद्तपाखें मधेसी मन्त्रीया विरोध

रक्षामन्त्री शरतसिंह भण्डारीं नेपाःया भूअखण्डताया विरोधय् न्ववात धइगु द्वपं बिसें विपक्षीतय्सं संसद अवरुद्ध यानाच्वंगु न्यान्हु दत। उमिसं रक्षामन्त्रीं राजीनामा बीमाः धइगु माग यासें थ्व हंगामा यानाच्वंगु खः। थुकिं यानाः संसदपाखें जुइमाःगु छुं नं ज्या जुइ फयाच्वंगु मदुनि। विपक्षीतय्सं हंगामा यानाच्वंगु हे कारणं उकियात कदर याये कथं माओवादीं थःगु पार्टीपाखें सरकारय् वनाच्वंम्ह भूमिसुधार मन्त्री प्रभु साहयात राजीनामा याकेधुंकल। तर लोकतान्त्रिक फोरमं धाःसा थःपिनि कोटां मन्त्री जुयाच्वंम्ह शरतसिंह भण्डारीयात पदमुक्त यायेगु खँय् आनाकानी यानाच्वंगु दु। गुकिया लिच्वः कथं विपक्षीतय्त संसदय् हंगामा यायेगु मसला लुयाच्वंगु दु। थज्याःगु अवस्थाय् थःगु अडान न्ह्यागु हे दुसां पदं राजीनामा बियाछ्वःसा उकिं द्वन्द्वयात मदयेका बीगु खः। राजीनामा मबिउतले तनाव दया हे च्वनी ।

रक्षामन्त्री भण्डारीया राजीनामा फ्वनेगु थ्व ज्यां मधेसी व पहाडी धइगु भावनायात अझ ग्वाका बीगु छगू खतरा धाःसा देशय् पिहां वःगु दु। वय्कलं थम्हं अथे धयागु मखु धकाः स्पष्टीकरण बीक बीक नं राजीनामा हे माः धकाः कांग्रेस व एमालेपाखें गुगु माग यानाच्वन उकियात निगू पार्टीया कचवं स्वयां नं निगू समुदायया द्वन्द्व कथं परिभाषित यायेगु कुतः जुयाच्वंगु दु। एमाले व कांग्रेसयात अथें नं पहाडियातय्गु पार्टी धाइ। आः उमिसं छम्ह मधेसी मन्त्रीया राजीनामा माल धकाः हथ्या हे क्यनाच्वंगुलिं लोकतान्त्रिक फोरमं थुकियात राजनीतिकरण स्वयां नं साम्प्रदायिकरण याइगु सम्भावना दु। अथे यात धाःसा उमिगु लागिं राजीनामा नं मेगु छगू लबः जुया बीगु खँय् शंका मदु ।

More Stories Like this