नुगलय् स्याःगु खँ

मुनीन्द्र

थगुनेया एसएलसी परिक्षाय् जूगु नेपालभाषाया विजोग

ईलोहँया ज्याझ्वलय् डा. चुन्दा बज्राचार्यया भाषणं वंगु एसएलसी परीक्षाय् नेपालभाषा विषयया त्रुटिपूर्ण न्ह्यसः पतिं नुगलय् तिक्कमिंगु घटनायात छक्वः हाकनं लुमंकाबिल। धाथें वंगु एस.एल.सी. परीक्षाय् नेपालभाषाया न्ह्यसःपतिइ पुलांगु न्ह्यसः न्यनाः ब्वँमिपिनिगु जीवनय् खेलवाद यायेगु कुतः जुल। अझ नेपालभाषा ब्वंकीपिं सकल शिक्षकपिंत ला थाराथारा न्हुइका बिउगु दु। ईलोहंया उगु ज्याझ्वलय् डा. चुन्दा बज्राचार्यं धयाः तिनि सिल कि एस.एल.सी. ला झिंन्यादँ न्ह्यःया पाठ्यक्रमया आधारय् तयार यानातःगु न्ह्यसः न्यंगु जुयाच्वन। न्ह्यसःपौ दयेकूम्ह गुलित बेहोसीम्ह शिक्षक धइगु खँ ला थुकिं नं प्रस्ट याः। थ्व जाँचया कारणं जितः नं थुलि आपतय् लाकल कि तःन्हु तक ला न्ह्यः हे मवः, तसकं छटपट जुल, पश्चाताप जुल। जिं हे जकं छुं द्वंका ला धकाः नुगलय् खँ वाला, छु याये छु याये जुल। थुबलय् हे जूगु घटनाया छत्वाःचा खँ थन न्ह्यथने त्यना ।

जि टिमोर लिष्ट धइगु देशं चुनावया ज्या सिधयेकाः नेपालय् लिहां वयागु। छन्हु आनन्दकुटी बिहारय् जूगु छगू महापरित्राणय् निग्रोध भन्ते नापलात। वसपोलं नापलायेसाथ "मुनीन्द्र सर, विश्वशान्ति बिहारय् हाकनं छक्वः नेपालभाषा ब्वंका बिज्याये माल" धकाः धयाबिज्यात। जिं न्हापा नं थन नेपालभाषा ब्वंकागुलिं म्हां धाये मफुत। जि लिपा अफगानिस्तान वने मासेंलि थन ब्वंकाच्वने मलात। "कासा जिउ भन्ते जिं ब्वंका बी" धकाः बचं बिया। लिपा दथुइ हे जिं कोर्स पूवंके माल। थन विश्वशान्ति बिहारय् नेपालभाषा कयाः ब्वनीपिं न्याम्ह ब्वँमि श्रामणेरपिं दु। श्रामणेरपिं नेपालभाषाय् बांलाः हे जू। नेपालभाषाया जाँच कुन्हु आकाझाकां मोबाइलय् तेजको नांया श्रामणेरया फोन वल "मुनीन्द्र सर, जिपिं ला खतम हे जुल, बरबाद हे जुल।" आँटे चाःगु सः न्यनाः, "छाय्, छु जुल?'' धकाः न्यना। लिसः वल, �सर जिमिसं ब्वनागु छुं नं पाठया न्ह्यसः मवः। गार्डयात न्यनाः इपिं नं खँय्त जूगुलिं जिमिसं छुं मसिउ धाल। जिमिसं ग्रामर व निबन्ध वःवःथे याये तर मेगु न्ह्यसःया लिसः बी हे मफुत, फेल हे जुइगु जुल।" धाःबलय् जि ला झसङ्ग वन। जिं ला कोर्स बुक स्वयाः हे ब्वंकागु खः। अले पूरा पूरा कोर्स सिधयेकूगु नं खः। इमिसं छुं हे पाठया छुं छुं हे न्ह्यसः मवः धाःबलय् जिगु ला हंशं हे थाय् त्वःतल। लँय् लानाच्वंम्ह जि हतपत किताब छक्वः निं स्वये धकाः छेँय् वना। सफूया मिति छक्वः स्वया, पाठ्यक्रम नं स्वया, थुकी ला बकाइदा न्हूगु हे कोर्स उल्लेख यानातःगु दु। पुलांगु परोपकार व जगतसुन्दर ब्वनेकुथिया न्ह्यसःपौ स्वया। उकी नं ठीक हे जूगु खनेदु। जितः ला व याये थ्व याये मंत। इपिं मस्त फेल जुल धाःसा छु यायेगु धकाः तसकं हे पीर जुल। हाकनं मेम्ह ब्वँमिया फोन वल, "जिमिसं ब्वनागु छुं हे मवः, फेल जुइ कि छु सर, छक्वः परीक्षा केन्द्रय् धया बीमाल" धाल। जिं थुबलय् अथे थथे छुं धाये मफुत उकिं "छिमिसं जिं धयाथें न्ह्यसः न्ह्याथे जूसां याना कि मयाना? कमसेकम व्याकरण, निबन्ध व पौ च्वयागु दुसा नं छुं न छुं नम्बर वइ आँटे जुइ मते, न्ह्यःने वःगु जाँच निं बांलाक बिउ" धकाः धयाछ्वया ।

जिगु मन मच्वँसेंलि निग्रोध भन्तेयात फोन यानाः धया, "भन्ते, मस्तय् जाँचय् नेपालभाषाया कोर्सय् हे मदुगु न्ह्यसः न्यन धाल, भन्तें छक्वः परीक्षा केन्द्रय् न्यना बिज्याये माली।" भन्तें जिउ धयाबिज्यात। न्यना स्वःबलय् परीक्षा भूल जुल, आःयात पुलांगु मार्कया आधार स्वयाः नम्बर बीगु धाल। क्या !, थुमि ला मचायात धाये थें अःपुक जवाफ बियाहल। तर जितः थ्व मस्त फेल जुइ धकाः तसकं चिन्ता जुया हे च्वन। धाधां मधाधां रिजल्ट नं वल तर नेपालभाषाय् सुं नं फेल धाःसा मजुल। प्रथम श्रेणी हे पास ला जुल तर नेपालभाषाय् गुलि गाक्क नम्बर वयेमाःगु खः उलि मवल। म्होतिं नं ८० नम्बर हइम्ह ब्वँमि कविन्दो श्रामणेरया हे ४५ जक वल। थुम्ह ब्वँमिया छाय् उलि म्हो नम्बर वल, व धाःसा धाये मफुत। सुं ब्वँमिपिं नेपालभाषाय् फेल मजूगु जूसां नं ब्वँमिपिनिगु नुगलय् तसकं तःधंक आघात लात। थ्व सुयागु दोष धायेगु? थुकथं कन्हय् नेपालभाषा ब्वनीपिं ब्वँमिपिं दइ तिनि ला? परीक्षा केन्द्रया गुलि लापरवाही थ्व? न्ह्यसःपौ दयेकूम्ह शिक्षकया दायित्व छु खः? न्ह्यसःपौ दयेकेत छक्वः पाठ्यक्रम स्वयेम्वाः ला? परीक्षा बोर्डया दायित्व छु खः? नेपालभाषा धकाः हेपे यायेगु ला? थुमिगु नैतिकता गन वन?

More Stories Like this