राष्ट्रिय स्तरया न्हूदँ समारोह समिति छाय् ?

अमीर ताम्रकार

उकिं छगू अनाधिकृत संस्था नेपाल भाषा मंकाः खलः अन्तर्गत न्हूदँ समारोह समिति दयेकेगु उचित मखु । हार अधिकार हे मदुगु संस्था न्हूदँ समारोह समिति दयेकेगु व अले मंकाः खलःया मूछ्याञ्जे पदिय मूछ्याञ्जे समितिइ दुथ्याइ धकाः धयाः न्ह्यावलें हालीमुहाली याकेगु पाय्छि मखु । नेपाल सम्वत्या प्रवर्तक संखधर साख्वायात राष्ट्रिय विभूतिया मान्यता विइ धुंकाः गणतन्त्र नेपाःया न्हापांम्ह प्रधानमन्त्री प्रचण्डया सरकारं नेपाल सम्वत्यात सरकारी मान्यता वियावीवं थ्व दायित्व जनस्तरं मखु, सरकारी स्तरं हे हंकेमाःगु खः । तर नेपाल सम्वत्यात सरकारी स्तरं हंकेवीगु धयागु खँ काचाक्क पिहां मवयेवं वहे पुलांगु धंगंहे न्हूदँ हनेगु ज्या न्ह्याना वयाच्वंगु खः । आः वयाः सरकारी मान्यताप्राप्त छु नं दिवस जयन्ती व वुंदियात सरकारीस्तरं हना वयाच्वंगु पृष्ठभूमिइ नेपाल सम्वत्यात नं सरकारी स्तरं हे हंकेवीगु जरुरी जुइ । सरकारी स्तरं हंकल धाःसा छगूला जनस्तरं थप कुतः यानाच्वने म्वाःल, मेख्य थुगु ज्याझ्वःयात निरन्तरता नं दइ । उगुहे मुंज्याय् शिक्षाविद् व नेवाः देय् दबूया संरक्षक लक्ष्मण राजवंशीजुं सरकारी स्तरं छाय् याकेमाःगु ? जनस्तरं यानावःगुयात थुकियातहे निरन्तरता वीमाःगु खँय् बहः वियादिल । वयकःनं मूछ्याञ्जे प्रति नं पतिं धस्वाका दिल । तर नं स्पष्ट यानामदी । खँ तछ्यानाः धयामदी ।

यथार्थय् सरकारी मान्यताप्राप्त छुंनं ज्याझ्वःयात जनस्तरं मखु सरकारयागु हे दायित्व जुइ । सरकारी मान्यताया अर्थ थुकिया सम्पूर्ण जिम्मेवारी सरकारयागु थःगु जुइ । थुकियात अधिराज्यव्यापी व सम्पूर्ण नेपाली जनताया मंकाः सम्वत् यायेत थ्व आवश्यक जुइ । जनस्तरं हनेगुया अर्थ झीपिं थःगु व सरकारी स्तरं हनेगु धयागु समय सापेक्ष नं जुइ । नेपाल सम्वतयात नेवाःतय्गु सम्वत् धाइपि नं मदुगु मखु । इमिगु अर्थात गैर नेवाःतय्त नं सम्झय् बुझय् यायेत नेवाःतय्सं जक हनेगु मयासे थ्व नेपाःया राष्ट्र दुनेया फुक्क नेपालीतय्गु राष्ट्रिय सम्वत् खः धकाः थुइकेगु धयागुहे गैर नेवाःतय्त अर्थात अढाइ करोड नेपाली जनतायात थुगु ज्याझ्वलय् सहभागी याकेफयेमाः । मखुसा थ्व द्वपं वीत गैर नेवाःत ल्यूने मलाइगु निश्चित खः । उकिं न्हूदँ समारोह समिति न्हूदँया छवाः निवाः न्ह्यः स्वनाः थःपिनिगु स्वार्थ पूवंकेगु उदेश्यं ई मन्त धाधां हत्थासं न्हूदँ समारोह समिति दयेकेगु परम्परायात आः थनहे दिका छ्वयेमाः । थुकी झी नेवाःतय्गु कल्याण दु ।

न्हूदँ धयागु न्ह्याइपुकेगु न्हि खः । थुगु न्हि खुन्हु भिंतुना कालविल यायेगु व तुच्चा नयेगु उपभोग मूलक परम्परायात नं म्हो यानाः न्हूदँ न्हू न्हूगु विचाः, आर्दश व संकल्प नं याये सयेकेमाः । थुकिया दुने मात्रै औपचारिक ज्याझ्वलय् लिकुंकाः नेपाल सम्वत् नाप नं स्वानाच्वंगु दु धयागु यथार्थतायात लोमंके मज्यू । नेपाल सम्वत् नेवाःतय्गु जक सम्वत् धकाः गैर नेवाःतय्सं द्वपं वीगु व राष्ट्रियताया सवालयात म्हो यायेगु कुतः जुयाच्वंगु दु । नेपाल सम्वत् छाय् राष्ट्रिय सम्वत् खः ? थुकिं छु गुगुकथं राष्ट्रियता नाप स्वानाच्वंगु दु ? लगायत न्ह्यसःयात गैर नेवाःतय्गु दथ्वी छलफल अन्तरकृयाया माध्यमं स्पष्ट यायेगु कुतः यायेमाः । अथ्यहे नेपाल सम्वत्या प्रवर्तक संखधर साख्वाःयात राष्ट्रिय विभूतिया मान्यता व्यूथें उकियात पठनपाठनय् दुथ्याकूगु मदुनि । छम्ह राष्ट्रिय विभूतिया वारे विद्यार्थीतय्त जानकारी वीगु कथं वयकःया म्हसीका वीगु कथंया शैक्षिक सामग्री दयेकाः पाठय्क्रमय् दुथ्याकेगु जरुरी दु । राष्ट्रिय विभूतिया म्हसीकां जक राष्ट्रिय जागरण थनेफै । थुकियात अझ व्यापक रुपं प्रचार प्रसारय् यंकेगु खःसा हुलाक टिकट, बुकलेट आदि पिकासे राष्ट्रिय विभूतिया प्रचार प्रसार स्वनिगलय् जक मखु, अधिराज्यया शहर वजारय् न्यंक यायेमाः । संखधर साख्वाः छम्ह नेवाः जूगुलिं थुकियात अझ नं साम्प्रदायिक रुप वीत स्वइपिं ब्राम्हणवादीत नं न्ह्यःने मवइमखु । थुपिं थःपिं न्ह्यःने मवसे नेवाःतय्त हे न्ह्यःने हयाः नेवाःत नाप नं मल्वाकी मखु । थुगु सम्भावनायात नं न्ह्यःने तयाः वनेमाः ।

छगू महत्वपूर्ण ज्या धयागु संखधर साख्वाःया यथार्थ किपाः व वयकःया थप म्हसीका मालेगु ज्या खः । वर्तमान संखधर साख्वाःया किपाः धात्थेंगु किपाः मखु, जुइफै मखु । इतिहासया पाना पुइकाः वंसां संखधर साख्वाःया लवाइ भेष भुषा नेवाःनाप मिलय् मजू । संखधरया किपाः सार्वजनिक याःवलय् नं मात्रै हचुवाया भरय् छगू आवेशं जक ज्या जूगु दु । छाय् निम्हय्स्यां पशुपतिइ जिर्णोद्धार याःम्ह महासामन्त जयसिंह राम महातय भास यागु मूर्तिया किपाः खः । छम्ह निम्हय्स्यां साख्वाया किपा थ्व धकाः न्ह्यःने हल उकियात हे सकल नेवाःतय्सं नाला कयावयाच्वंगु दु । थुकियात कयाः अध्ययन अनुसन्धान न्ह्याकेगु नं जरुरत दु । साख्वाःया वास्तविक किपाः व म्हसीकात न्ह्यःने महयेकं थुकियातहे यथास्थितिइ न्ह्यःने यंकेगु ज्या जुइमखु । नेपाल सम्वत्यात सरकारी मान्यताला दत तर थुकियात व्यवहारय् छ्यलेत सरकारी स्तरं कञ्जुस्याम्ह यानाच्वंगु दु । छक्वला थुज्वःगु खँ नं न्ह्यःने दत नेपाल सम्वत्यात सांस्कृतिक मान्यता कथं न्ह्यःने यंकेगु व व्यवहारय् मेगुहे सम्वत्यात छय्ला यंकेगु विक्रम सम्वत्यात प्रयोग विहिन याना यंकेगु खँ नं खँहे जक जुल व व्यवहारय् थ्व लागुहे जुयाच्वंगु दु । नेपाल सरकारं राष्ट्रिय सम्वत्या मान्यता व्यूगु उलिमसि वर्ष लिपा नं नेपाल सम्वत्यात छ्यलावुलाय् हःगु मदु व विक्रम सम्वत्यात व्यवहारं व्यागलं तयेगु ज्या जूगुहे मदुनि ।

थुगुकथं नेपाल सम्वत्या सरकारी मान्यता काये धुंकाः नं आन्दोलनयात छसीकथं च्वय् न्ह्यथनागु विषयलय् केन्दि्रत यानाः न्ह्याकांतुं यंकेमानि । मात्रै न्हूदँ हनेगु ज्याझ्वलय् लिकुकुं मजूगुलिं थ्व ज्याझ्वः आः राष्ट्रिय स्तरय् यंकेमाःगु जरुरत जुइ धुंकूगु दु । थुकियात थुइकाः वा आत्मासात यानाः न्ह्याः वंगुहे नेवाः व नेपालीतय्गु वुद्धिमानी जुइ । थुकिया विपरित वनेत स्वइपिं इतिहासया कालकण्डं व्यागलं तइ । व न्ह्याम्हहे छाय् मज्वीमाः थौंया आवश्यकता व इलं फ्वंगु मागयात झीसकस्यां सम्वोधन यायेगु हे स्वयेमाः । नेपाल सम्वत्यात व्यवहारय् छ्ययेकेत व राष्ट्र व्यापी रुपं सम्मान यायेगु व याकेगु ज्या ल्यंहे दनि । थ्व ज्या यात पूवंकेगु जक स्वयेमाः । नेपाल सम्वत् धा वा छुनं कथंया आन्दोलनयात सामूहिक दृष्टिकोणयात न्ह्यःने यंकेमाः । व्यक्तिं छुं यात वा छु मयात धयागु खँया मूल्यांकन जुइ मखु । व्यक्तिया मूल्यांकन परिवार याइ, छेँजःपिसं याइ । संस्थायात खल्तिइ तयाः कमाइया जरिया दयेकीपिन्त समाजं माफी वी मखु, बीफैमखु ।

More Stories Like this