भारत भ्रमणया इलय् गोप्य सम्झौताया आशंका

एकीकृत नेकपा (माओवादी) या न्वकु व वर्तमान प्रधानमन्त्री डा. बाबुराम भट्टराईं कन्हय्निसें भारतया औपचारिक भ्रमणय् झायादीत्यंगु दु । उगु भ्रमणया इलय् राष्ट्रहितया विषयलय् स्पष्ट खँ तयादीत सर्वदलीय नेतातय्सं प्रधानमन्त्री डा. भट्टराइयात सुझाव वियादीगु दु । वयकःनं वंगु सोमवाः सिंहदरवारया प्रधानमन्त्रीया कार्यालयय् सर्वदली वैठक सःतादीगु इलय् उगुकथं सल्लाह बियादीगु खः । टनकपुर सन्धि, डीपीकार निर्माण, सीमा विवाद लगायत विषयलय् पिहां वयाच्वंगु समस्या ज्यंकेत प्रधानमन्त्री डा. भट्टराईं पहल यायेमाःगु खँय् वैठकय् सहभागी नेतातय्सं अप्वः बहः व्यूगु खः । नेपाः भारतया दथ्वी ताःइलं निसें थीथी समस्यात पिहां वयाच्वंगु दु । उगु समस्यायात कयाः थीथी इलय् थीथी व्यक्तित व प्रधानमन्त्रीपाखें छलफल यानाः समस्या ज्यंकेगु कुतः जूसां ताः धाःसा लानाच्वंगु मदु । निगू देशया दथ्वी हित जुइगु खँत यक्कों दुगुलिं उगु विषय वस्तुयात धलःथेंहे दयेकाः छलफल न्ह्यःने यंकेमाःगु खँय् अप्वःसिगु जोड दु ।

इलय् व्यलय् भारतनाप यक्कों खँय् सहमति जुयाः सम्झौताहे जूसां यक्को विषयत व्यवहारय् लागू जुयाच्वंगु नं मदु । उगुकथं सहमति सम्झौता यानाः नं लागू मजुल धाःसा उकिया छुंहे औचित्यता दइमखु ।
प्रधानमन्त्री डा. भट्टराईया भारत भ्रमणया इलय् नेपालय् लोड सेडिङ्ग म्हो यायेगु विषयलय् खँ ल्हानाः भारत अप्वःयासे अप्वः विजुली आयात यायेगुया नाप नापं थुगु क्षेत्रय् भारतं अप्वः लगानी याकेत कुतः याइगु धाःगु दु । अथ्यहे नेपालं म्हो जक सामानत भारतय् निकासी जुयाच्वंगु दुसा भारतं यक्को सामानत आयात जुयाच्वंगु कारणं व्यापार घाटाया ल्याः अप्वः जुजुं वनाच्वंगु खँय् चिउताः प्वंकाः नेपालं अप्वःयासे अप्वः सामानत भारतं थःगु वजारय् थाय् बीमाःगु खँय् नं अनया नेतात व मन्त्रीत नाप सहलह यायेमाःगु धाःगु खः ।

माओवादीयात भारत विरोधी धयातःसां थुगुसी प्रधानमन्त्री भट्टराइयात भारतं प्रत्यक्ष अप्रत्यक्ष ग्वाहालि याःगुहे खनेदु । भारतया विरोधी जुइक जुइकं नं माओवादीया न्वकु डा. भट्टराइयात प्रधानमन्त्री दयेकेत मधेसी मोर्चानाप प्यंगू बुंडे सहमति याकेगु नितिं नं भारतं अप्रत्यक्ष ग्वाहालि याःगुहे खनेदु । माओवादी पार्टी भारत विरोधी धाःसां डा. भट्टराई भारतया पक्षय् दनावयाच्वंगुलिहे भारतं डा. भट्टराइयात मधेसीमोर्चा नाप प्यंगू वुंडे सहमति दयेकेत लकस दयेका व्यूगु खः । भारतया चाहना य् पार्टीया नायः प्रचण्ड दुमथ्याःगुलिंहे डा. भट्टराइयात प्रधानमन्त्रीकथं न्ह्यःने हःगु खः । भारत भ्मणया इलय् छुंनं देशघाती व विवादास्पष्ट सन्धि सम्झौता मयायेगु धकाः प्रधानमन्त्री डा. भट्टराइपाखें खँ पिहां वःसां नेपाःया राजनीतिक विश्लेषकतय्सं उज्वःगु सन्धि सम्झौतात याये याइमखु धकाः धायेफैमखु धकाः आशंका प्वंकूगु दु । प्यंगू वुंदे सहमतिपत्रय् न्ह्यानातःगु भारतं प्रस्तावित ज्याझ्वःत छसीकथं पूवंकाः न्ह्याः वनेगु धयागुया वाक्यं मूख्यत आशंका पिहां वयाच्वंगु खः । भारतं तत्काल नेपाःया अन्तराष्ट्रिय विमान स्थलया भारतया एयर मार्सल -सेना) तयेगु, सुपुर्दगी सन्धि याकेगु व फत धाःसा भारतया दूतावास व भारती नागरिकतय्गु लगानी दुगु उद्योग कलकारखानाय् सुरक्षाया नितिं भारतीय सेनात तयेगु नितिं नेपाःनाप सम्झौता याकेत स्वयाच्वंगु दु । थ्व सम्झौता गोप्यरुपं यानाहे वल धाःसां नेपाली जनतां यथार्थता आः थत्थें सीके मफैगुलिंहे थप संका ब्वलना वयाच्वंगु खः ।

More Stories Like this