फोरम लोकतान्त्रिकय् विवाद तच्वल

येँ (झीगु स्वनिगः)

देय् कुचा थलेगु थेंजाःगु विवादास्पद अभिब्यक्ति बियादीम्ह वर्तमान सरकारय् मधेसी जनअधिकार फोरम -लोकतान्त्रिक)पाखें प्रतिनिधित्व यानादीम्ह रक्षामन्त्री शरदसिंह भण्डारीया राजीनामाया बारे क्वःछिइत धकाः म्हिगः मंगलवाः च्वंगु मधेसी जनअधिकार फोरम -लोकतान्त्रिक)या राजनीतिक समितिया मुँज्या विनानिष्कर्ष क्वचाःगु दु । फोरम लोकतान्त्रिकय् रक्षामन्त्रीयात कयाः विवाद झन झन तच्वयाः वःगु दु ।
पार्टीया केन्द्रीय ज्याकू सानेपाय् च्वंगु मुँज्याय् राजीनामाया बारे राजनीतिक समितिया दुजःतय् दथुइ विवाद जूगुलिं थौं मधेसवादी मोर्चालिसे वार्ता याइगु जूगु दु । नापं थौं हे उगु विषययात कयाः थौं बुधवाः हे क्वःछिइ धकाः धाःगु दु ।

मुक्कं यानाः १९ म्ह दुजःत दुगु राजनीतिक समितिइ अप्वः यानाः दुजःतय्सं रक्षामन्त्रीयात राजीनामा बिइकेगु पाय्छि जुइमखु धकाः अडान काःगुलिं फोरम लोकतान्त्रिकं निर्णय याये मफयाच्वंगु खः ।
इमिसं रक्षामन्त्रीपाखें भाषण बिइगु इलय् भाषागत त्रुटि जक जूगु तर आशय गलत मजू धकाः दावी यानादीगुलिं हे राजीनामाया बारे निर्णय याये मफयाच्वंगु खः । रक्षामन्त्री शरदसिंह भण्डारीं वंगु असोज ९ गते येँय् छगू ज्याझ्वलय् न्वंवायेगु झ्वलय् 'मधेसयात विभेदय् लाकातल धाःसा मधेसया २२ गू जिल्लां निर्णय यानाः नेपालं ब्यागलं च्वनेफु' धकाः अभिब्यक्ति बियादीवं वय्कः विवादय् लाःगु खः । फोरम लोकतान्त्रिकया राजनीतिक समितिया मुँज्या सोमवाः नं ८ घण्टा तक च्वंसां निर्णय याये मफुगुलिं म्हिगः मंंगलवाः हाकनं मुँज्या च्वंगु खः ।