भारतलिसे विवादित खँ मल्हायेत माओवादीपाखें प्रधानमन्त्रीयात निर्देशन

'राष्ट्रिय सरकार दयेके धुंकाः जक सन्धि—सम्झौता’

येँ (झीगु स्वनिगः)

एकीकृत नेकपा -माओवादी)या म्हिगः मंगलवाः च्वंगु स्थायी समितिया मुँज्यां प्रधानमन्त्री डा. बाबुराम भट्टराईयात विवादित विषययात कयाः भारतलिसे सहलह मयायेत निर्देशन ब्यूगु दु । पार्टीया अध्यक्ष प्रचण्डया निवासय् म्हिगः सुथय् च्वंगु स्याथी समितिया मुँज्यां प्रधानमन्त्री नापं पार्टीया न्वकु भट्टराईयात उगु कथं निर्देशन ब्यूगु खः । उगु मुँज्यां प्रधानमन्त्रीया भारत भ्रमण नितान्त निगू देय्या दथुइ सद्भाव भ्रमण जक खः धकाः न्ह्यथंगु दु । मुँज्यालिपा माओवादीया प्रवक्ता दिनानाथ शर्मां संचारकर्मीतलिसे खँल्हासें उगु कथं जानकारी बियादीगु खः । वय्कलं विवादित सन्धि व सम्झौताय् सहलह हे मयायेत निर्देशन ब्यूगु दु धकाः नं जानकारी बियादिल । राष्ट्रिय सहमतिया सरकार दयेके धुंकाः जक विवादित सन्धी व सम्झौताया विषययात कयाः भारतलिसे सहलह यायेगु उपयुक्त जुइ धकाः ठहर यानाः माओवादीं व हे कथं जक न्ह्याः वनेत प्रधानमन्त्री डा. बाबुराम भट्टराईयात सुझाव ब्यूगु दु धकाः नं प्रवक्ता शर्मां स्पष्ट यानादिल ।

वय्कलं मुलुक संक्रमणकालीन अवस्थाय् दुगु नापं सरकारं पूर्णता काये मफयाच्वंगु अवस्थाय् दीर्घकालिन लिच्वः लाइगु नापं विवादित सन्धि सम्झौतायात कयाः छुं नं कथंया निर्णय व सहलह ब्याकेगु ज्या यायेमजिउ धकाः ठहर याःगु खँ नं न्ह्यथनादीसें प्रधानमन्त्रीया भ्रमण नितान्त सदभावना भ्रमण जुइमाः धकाः बः ब्यूगु खँ न्ह्यथनादीगु दु । अथे हे भ्रमणया झ्वलय् व्यापार व्यवसाय, परिवहन लगायतया नेपाःया हित जुइगु विषययात कयाः भारत सरकारलिसे सहलह ब्याकाः सहमति यायेफैइगु खँय् नं मुँज्याय् सहलह जुल धकाः जानकारी बियादीगु दु । थ्व हे दथुइ प्रधानमन्त्री डा.बाबुराम भट्टराई कन्हय्निसें प्यन्हु तकया नितिं भारत भ्रमणया नितिं उखेपाखे वनीगु जूगु दु । उगु भ्रमणय् उपप्रधान नापं परराष्ट्रमन्त्री नारायणकाजी श्रेष्ठ प्रकास, संचार मन्त्री जयप्रकाशप्रसाद गुप्ता, भौतिक योजना तथा निर्माण मन्त्री हृदेश त्रिपाठी, सिँचाइ मन्त्री महेन्द्र यादव,उद्योगमन्त्री अनिल साह व अर्थ मन्त्री वर्षमान पुन नं दुथ्याइ धाःगु दु ।