भिक्षु बुद्धघोष लुमंकाः ख्वपय् शोक सभा



ख्वप(सन्ध्या टाइम्स)/मदुम्ह बुद्धघोष भन्तेया लुमन्तिइ ख्वपया मुनिविहारय् छगू शोक सभा जुल। मुनिविहार, नेवाः बौद्ध पुचः व मैत्री युवा संघया मंकाः ग्वसालय् जूगु उगु सभाय् धम्मशोभन महास्थवीर मूपाहां कथं बिज्याःगु खः। सभाय् रत्नसुन्दर शाक्यं बुद्धघोष भन्तेया मृत्यु धइगु नेपाःया बुद्ध धर्मया निंतिं छगू तःधंगु क्षति खः धासें वसपोल भन्तेया जीवनी कनादिल। परियत्ति शिक्षाया संस्थापक जुयाबिज्याःम्ह बुद्धघोष भन्तें बुद्ध धर्मय् यानाबिज्याःगु योगदान बारे मैत्री युवा संघया अध्यक्ष त्रिरत्न शाक्यं चर्चा यानादिल। नेवाः बौद्ध पुचःया अध्यक्ष धर्मरत्न शाक्यं लसकुस यानादीगु उगु सभाय् तीर्थराज बज्राचार्यं सुभाय् बियादीगु खः। सभा मुनिविहारया अध्यक्ष रामकृष्ण वैद्यया सभापतित्वय् न्ह्याःगु खःसा सभाय् भन्ते बुद्धघोषया लुमंतिइ छगू मिनेट मौन धारण नं याःगु खः। सभाय् बौद्ध सम्पदा संघ, बौद्ध शैक्षिक संघ, नेपाल बौद्ध परम्परा संघ, ज्ञानमाला भजन खलः लगायतं नं श्रद्धाञ्जली प्वंकूगु खः।