पञ्चदानया दां विहार दयेकेत लःल्हात

येँ(सन्ध्या टाइम्स)/सामुहिक पञ्चदान कार्यक्रम समितिं संकलन जूगु नीछगू लख तका दां आइतवाः छगू समारोहया दथुइ नेपाल बज्रयान महाविहार निर्माण मूल समितियात लःल्हात। सामुहिक पञ्चदान कार्यक्रम समितिया ग्वसालय् येँया इतुंबहालय् जूगु रकम हस्तान्तरण ज्याझ्वलय् पुलांम्ह मन्त्री गोपाल किराँती मूपाहां कथं झाःगु खः।
उगु दां लुम्बिनीइ वज्रयानी विहारया निर्माण यायेगु लागिं खर्च यायेत्यंगु खः। वंगु छुं दँ न्ह्यवंनिसें मंकाः पञ्चदान वनाः दां मुंकुसें वज्रयानी विहार निर्माणय् खर्च याना वयाच्वंगु दु।
दां लःल्हानादिसें मूपाहां किराँतीं सरकारपाखें थःगु व्यक्तिगत रुपं नं थुगु ज्याय् माःगु ग्वाहालि यायेगु बचं बियादिल। लुम्बिनी विकास कोषया उपाध्यक्ष कर्मासंघं थुगु विहार बुद्ध धर्मया स्वंगुलिं यानयात (एकताया प्रतिक कथं एकतां विविधता व विविधतां एकताया रुपय्) जुइगु विश्वास प्वंकादिल।
समितिया नायः डा. नरेशमान बज्राचार्यया सभापतित्वय् न्ह्याःगु उगु ज्याझ्वलय् वय्कलं कृया संग्रह सफूया आधारय् लुम्बिनीइ नेवाः परम्परागत शैलीं विहार निर्माण जुइगु खँ कनादिल।
विहार निर्माणया निंतिं वंगु शनिवाः झिन्ह्यम्ह दुजः दुगु ज्यासना पुचः स्वनाः थ्वहे वइगु माघंनिसें ज्या न्ह्याकीगु खँ ग्वसाः खलकं धाःगु दु। ज्याझ्वलय् संघनायक भिक्षु अश्वघोष महास्थवीर, मूल समितिया सल्लाहकार सर्वज्ञरत्न तुलाधर, संस्कृतिविद् डा. सत्यमोहन जोशी, बौद्ध विद्वान बज्रराज बज्राचार्य, डा. त्रिरत्न मानन्धर, पद्मरत्न तुलाधरपिं उपस्थित जुयादीगु खः। ज्याझ्वलय् उपसंयोजक रेबरत्न बज्राचार्यं लसकुस यानादीगु खःसा मय्जु उर्मिला ताम्राकारं सुभाय् बियादीगु खः।