फोरम लोकतान्त्रिकं माओवादीया धारणा फ्वन

येँ(सन्ध्या टाइम्स)/रक्षामन्त्री शरदसिंह भण्डारीया अभिब्यक्तियात कयाः विवाद तच्वया वनाः निर्णय याये मफयाच्वंगु अवस्थाय् मधेसी जनअधिकार फोरम (लोकतान्त्रिकं) थःपिनिगु बारे माओवादीया आधिकारिक धारणा माग याःगु दु। थौं सुथय् फोरम लोकतान्त्रिकया अध्यक्ष माओवादीया विजय गच्छेदार माओवादी अध्यक्ष प्रचण्डया छेँय् वनाः रक्षामन्त्रीया विवाद बारे माओवादीया आधिकारिक धारण माल धकाः माग याःगु खः।
फोरम लोकतान्त्रिक दुने नं रक्षामन्त्रीया राजीनामायात कयाः विवाद तच्वया वंगुलिं थौं सुथय् छु याःसा जी धकाः प्रचण्डलिसे अध्यक्ष गच्छेदारं सल्लाह यानादीगु खः। उगु इलय् वय्कलं सरकार निर्माणया निंतिं जूगु प्यंगू बुँदाया सम्झौता बारे नं माओवादीया आधिकारिक धारणा माग यानादीगु खः।
उखे रक्षामन्त्री बारे फोरमया थौं नं बैठक च्वनीगु जूगु दु।
थ्वहे दथुइ माओवादी प्रवक्ता दिनानाथ शर्मां थौं छगू प्रेस विज्ञप्ति पिकासें मधेसी मोर्चालिसे जूगु प्यंगू बुँदे सम्झौता राजनीतिक दतावेज खः व रक्षामन्त्री भण्डारीयात थःपिंसं राष्ट्रघाती धयागु मदु धकाः स्पष्ट याःगु दु। लिसें उकी शान्ति व संविधान निर्माणय् लिच्वः लाइ कथं छुं नं ज्या मयायेत नं इनाप यानातःगु दु।