कम्प्युटर विस्फोट जुयाः छम्ह प्रहरी सित

निम्ह प्रहरी घाःपाः, अनुसन्धान न्ह्याकल
येँ(सन्ध्या टाइम्स)/थौं सुथय् वीरगञ्जया सशस्त्र प्रहरी ज्याकुथी कम्प्युटर विस्फोट जुयाः छम्ह सशस्त्र हवल्दार सीगु दुसा मेपिं निम्ह प्रहरीत नं घाःपाः जूगु दु।
उगु घटनाय् लानाः वीरगञ्ज भन्सार सुरक्षा बेस क्याम्पय् कार्यरत सशस्त्र प्रहरीया हवल्दार केदार काफ्ले सीगु खः धकाः पर्सा प्रहरीं धाःगु दु।
सुथय् सवा १० बजे सञ्चार कक्षय् दुगु कम्प्युटर चायेकेत्यंगु इलय् आकाझाकां कम्प्युटर मुयाः घाःपाः जूम्ह काफ्लेयात वीरगञ्जया नेशनल मेडिकल कलेजय् वास याना च्वँच्वं हे सीगु खः।
कम्प्युटर विस्फोट जूबलय् तसकं तसःगु सः पिहां वःगु खँ सशस्त्र प्रहरीया उपरीक्षक राम विकं जानकारी बियादीगु दु।
विस्फोटय् लानाः सशस्त्र प्रहरी नायव निरीक्षक कृष्णहरी खड्का व सहायक निरीक्षक राम लामा नं घाःपाः जूगु दु। इपिं निम्हेसित नं नेशनल मेडिकल कलेजय् वासः याकाच्वंगु दु।
सुथय् नियमित ज्या यायेत कम्प्युटर चायेकेवं अन आकाझाकां विस्फोट जूगु खः। विस्फोट बारे प्रहरीं अनुसन्धान न्ह्याकेधुंकूगु खँ नं उपरीक्षक विकं जानकारी बियादीगु दु।