'प्रमयात माओवादीया निर्देशन'

येँ(सन्ध्या टाइम्स)/कंस भारतया भ्रमणय् झायेत्यंम्ह प्रधानमन्त्री डा. बाबुराम भट्टराईयात अन वनाः छुं कथंया विवादित विषयय् न्वमवायेत माओवादी पार्टीं निर्देशन बिउगु दु।
माओवादी अध्यक्ष प्रचण्डया छेँय् थौं सुथय् च्वंगु स्थायी समितिया बैठकं पार्टी उपाध्यक्ष एवं प्रधानमन्त्री भट्टराईयात उगु निर्देशन बिउगु खः। बैठक लिपा संचारकमीलिसे खँ ल्हासें पार्टी प्रवक्ता दिनानाथ शर्मां विवादित सन्धि सम्झौता लगायतया विषययात कयाः छलफलय् हे प्रवेश मयायेत प्रमयात निर्देशन बिउगु खँ कनादिल।
प्रधानमन्त्रीया भारत भ्रमणयात नितान्त सद्भावना भ्रमण दयेकेगु व यदि विवादित विषयत पिहां वल धाःसा राष्ट्रिय सरकार दयेके धुंकाः जक उकिया बारे छलफल याये धकाः लिसः बिया थकेत निर्देशन बिउगु दु।
थ्वसिबें न्ह्यः अध्यक्ष प्रचण्डं निक्वः तक सःतूगु स्थायी समितिया बैठक बहिष्कार याःपिं उपाध्यक्ष मोहन बेद्य पक्षधर नेतात नं थौंया बैठकय् धाःसा उपस्थित जूगु खः। प्रम भट्टराई प्यन्हुयंकंया भारत भ्रमण यायेत कंस उखे झायेत्यंगु दु।
विवादया खँ मल्हायेत भारत नं तयार
प्रधानमन्त्री भट्टराई भारत वइबलय् वय्कःलिसे छु छु विषयय् सहलह यायेगु धकाः भारतं एजेण्डा तयार यानातःगु खः, उकियात कयाः नेपालय् विरोधया सः थ्वयावःगुलिं आःयात 'प्रम भट्टराईया सुविधाया लागिं' उगु एजेण्डाय् खँ मल्हायते भारत तयार जूगु दु।
भारतया उच्च स्रोतयात उद्घृत यासें बीबीसीं जने याः कथं प्रम भट्टराईलिसे सहलह यायेगु लागिं भारतं सुपुर्दगी सन्धि, एअर मार्शल सम्बन्धी सम्झौता बारे खँ ल्हायेगु धकाः एजेण्डा तयार यानातःगु खः। तर थ्व बारे आः खँ ल्हायेबलय् प्रम भट्टराईयात मछिनीगु अवस्था वयेफु धकाः भारतं थ्व खँ पित महयेगु निर्णय याःगु खँ समाचारय् धयातःगु दु।
अथे खःसां भारतं सुरक्षा सम्बन्धी थःपिनि सरोकार धाःसा प्रम भट्टराईया न्ह्यःने तइगु खँ धाःगु दु। खास यानाः नेपाःया खुल्ला सिमानापाखें भारतयात जुयाच्वंगु खतरा व नेपालय् लगानी यानाच्वंपिं भारतीय उद्योगपतितय्त जुयाच्वंगु खतराया बारे भारतीय पक्षं खँ ल्ह्वनी धाःगु दु।
प्रम भट्टराईया थ्व भारत भ्रमणयात भारतय् नं विशेष महत्व बियाः स्वयाच्वंगु दु।