भविष्य पियाच्वनेगु झ्वलय्

पामिला

भविष्य सुन्दर हँ
प्रकृति झन बाँला,
भविष्य थौं लाल कयाच्व‌ंगु दु
दुनुगःया धुकुमानय्
प्रकृतिया हे गन गन तःपुखु दु द्यने ।

जि हथाय् चायाच्वना,
बाँलागु भविष्य उला स्वयत
व सुन्दर भविष्य थःगु हे नालेत ।

जिगु सुन्दर भविष्य
ग्वः ? गबले वईगु ?
जि व महाभारतया अभिमन्यूला मखु
मांया प्वाथं हे भविष्यया खँ
फुक्क सय्का सीकाम्ह
जिला छम्ह बर्तमान
खुशी बाःया निरन्तर न्ह्यानाच्वंगु लः
अले, वहे लखय् जायावःगु छगः लः फ्वंगः

भविष्य ध्वदुइकेगु कुतलय्
गन जिम्ह सृष्टिकर्ता
छ थी सृष्टिया बिनाश यानाःसां
जितः थूगु जीन्दगी नांया सृष्टिई
ब्वलंका ब्यूगु दु ।

फुइ ध‌ुंकूगु भूतयात बर्तमानलिसे हिला तःगु दु
भूतया सुन्दर भविष्य, बर्तमान
थौं यइपुक्क छ्यय्के बिया तःगु दु

अले, थौं थःगु भविष्य,
थथें स्वय् आय्बुइकाच्वनाम्ह जि,
ज्यूसा थःत बह्रः तयासां
जिगु भविष्य हिला काय् मास्ति वः
थःहे मिया सां
व सुन्दर भविष्य न्याना कायय् मस्ति वः ।

सृष्टिया बाँलागु दसु,
ध्याचलं थहाँ वया मुलुकया च्वंम्ह
छफ्वः पलेस्वाँ
लनेत स्वय् व लिसे थःगु जीन्दगी
दाय्त स्वय् वैगु हिसी थःगु न्हिला नाप
तर फ्यासुल
झ्यागु वहे
वैगु ग्यसुलागु जीन्दगी हें
अर्थबोध जीन्दगीं भय्ब्यूगु हिसीं ।

सुपाय् खिना लुकू ब्यूम्ह सुर्द्य
सुन्दर संसार लिसें काना काना पिच्चा म्हितुम्ह सुर्द्य
तर न्हयब्वल छगु सुन्दर सृष्टि
पिडा सुचुकानं न्ह्यब्वल बाँलागु दृष्टि
साय्द व हे ला धाथेगु जीन्दगी
थःत न्ह्यागु थज्जु
मेपिनी मिखाय् बाँलासु यगाय्केवं गाम्हः
बुलुहु च्याय्गु सिवेत
थःगु अन्त्य गबले मथूम्ह
हीइक, जल्ल थना
यचुका बीगु कुतः जक न्ह्यःब्वय्वं गाम्ह
छप्वाः सी मत
गुलि बाँला वयागु सृष्टि नं
गुलि बाँला वं यागु सृजना

छझाः मिखाः तिसी वं
व फुक्क लुमंकेवं
इतःमतः कनावईगु
सासः फी थाकुया वइगु
छथी सृष्टिया धें धें बल्ला
सुन्दर सृष्टि ब्वलंकेत
मेगु सृजनात न्हंका च्वनाम्ह जि
जि, जि हे खना अजूचाः
सुयां बाँलागु सृष्टि न्हंकासां
म्हिगःला जिं फुकेहे धुन
जिम्ह सृष्टिकर्ता जिम्ह माम्हं
चायकं मचायकं बर्तमान नाप
हिला ब्युगुहे थें च्वं

सुन्दर भविष्य पियाच्वना थौं
जिगु बर्तमानयात छ्याला
अले, थःगु सुन्दर सृजनात न्ह‌का

More Stories Like this