थुगुसीया न्हूदँ खुल्लामञ्चय्

पद्मरत्नया नेतृत्वय् न्हूदँ समारोह समिति

येँ (सन्ध्या टाइम्स)/थनिं स्वंगू दशक न्ह्यवंनिसें नेवाःतय्सं येँया बसन्तपुली दँय्दसं न्यायेका वयाच्वंगु नेपाल संवत्या न्हूदँ थुगुसी न्हापांखुसी तिंख्यःया खुल्लामञ्चय् याइगु जूगु दु ।

थुगुसी नेवाःतय्गु छगू कथं शक्ति प्रदर्शनया रुपय् न्हूदँ विशेष समारोह खुल्लामञ्चय् यायेगु निर्णय याःगु खः। उगु ज्याझ्वलय् नं मू पाहां प्रधानमन्त्री हे जुयादी।
नेपालभाषा मंकाः खलःया ग्वसालय् म्हिगः येँय् जूगु छगू तःजिगु मुँज्यां गठन याःगु 'नेपाल संवत ११३२ राष्ट्रिय न्हूदँ समारोह संयोजन पुचः'या थौं सुथय् च्वंगु बैठकं उगु निर्णय याःगु खः ।

बैठकं थुगुसीया न्हूदँ समारोह समितियात 'राष्ट्रिय संवत् नेपाल संवत् न्हूदँ समारोह समिति ११३२' धकाः नां तःगु दु। थुगुसीया न्हूदँ समारोह समितिया संयोजन पुचःया संयोजकया रुपय् पद्मरत्न तुलाधरयात ल्यःगु दु। वय्कःया नेतृत्वय् १०१ म्ह दुजः दुगु न्हूदँ समारोह समिति गठन यायेगु नं निर्णय नं याःगु दु। थ्वहे वइगु बुधवाः न्हूदँ समारोह समिति स्वनेगु ग्वसाः दु ।

'राष्ट्रिय संवत् नेपाल संवत् न्हूदँ समारोह समिति'इ नेवाःतय्गु थीथी जातीय खलः पुचःया प्रतिनिधि, नेवाः स्वायत्त राज्य मंकाः संघर्ष समितिइ दुथ्याःगु घटकया प्रतिनिधि, न्हूदँ समारोह समितिया पुलांपिं नायःत नापं नेवाः आन्दोलनया न्ह्यलुवातय्त दुथ्याकेगु धकाः नं निर्णय याःगु दु। समन्वय पुचलं न्हूदँया ज्याझ्वः न्ह्याकेत पुचःया थीथी दुजःतय्त थीथी जिम्मा नं बिउगु दु ।

थ्वहे दथुइ उगु समन्वय पुचःया दुजःपिं, नेपाल संवत्या आन्दोलन नापं नेवाः आन्दोलनया न्ह्यलुवात सरकारपाखें राज्यस्तरया न्हूदँ हनेमाःगु, नेपाल संवत्यात सरकारी ज्याखँय् प्रयोग यायेमाःगु, सरकारं नेपाल संवत्या क्यालेण्डर पिकायेमाःगु, न्हूदँ कुन्हुयात नेपाल संवतया न्हूदँ धकाः हे विदा बीमाःगु लगायतया खँ ज्वनाः प्रधानमन्त्रीयाथाय् कन्हय् सुथय् तकया दुने डेलिगेशन वनीगु जूगु दु ।