न्हूदँ ११३२ हनेत सहलह मुँज्या

येँ (सन्ध्या टाइम्स)/ नेपालभाषा मंकाः खलकं न्हूदँ हनेगु झ्वलय् म्हिगः सःतूगु छगू भेलां "नेपाल संवत ११३२ राष्ट्रिय न्हूदँ समारोह संयोजन पुचः" नीस्वंगु दु। थनया तलेजु पार्टी प्यालेसय् जूगु मुँज्यां उगु पुचः नीस्वंगु खः। पुचलय् नेपालभाषा मंकाः खलःया नायः पद्मरत्न तुलाधर, मंकाः खलःया छ्यांज्ये नरेशवीर शाक्य, डा. केशवमान शाक्य, लक्ष्मीदास मानन्धर, सुजिव बज्राचार्य, ई.मोहनकृष्ण डंगोल, नरेश ताम्राकार, पंचलाल महर्जन, कृष्णबहादुर घःजु, किरण शाक्य व सरिता महर्जन यानाः झिंछम्ह दुजः दुथ्याकूगु दु ।

न्हूदँ समारोह समिति-११३१ या नायः विपेन्द्र महर्जनया सभापतित्वय् न्ह्याःगु उगु मुँज्याय् अप्वः वक्तातय्सं परम्परागत रुपं न्हूदँ हने मजिउगु व सदां छम्ह हे जक व्यक्ति न्हूदँ समारोह समितिया छ्यांज्ये जुयाच्वने मजिउगु बिचाः प्वंकूगु खः। नायः तुलाधरं राष्ट्रिय स्वरुपया कमिटी गुकथं गठन यायेगु धइगु विषयय् सकलेंपाखें सुझाव वयेमाः धासें थुगुसीया न्हूदँ तिंख्यलय् जुइमाःगु व नेवाःतय्गु सछि व च्याताजिया बाजं खलः अन ब्वयाः इन्टरनेटपाखें विश्व प्रचार यायेगु बिचाः प्वंकादिल। नेवाः जागरण मञ्चया सुजिव बज्राचार्यं समारोहय् हिउपाः वयेमाःगु खयां नं संरक्षक धाःसा पद्मरत्न हे जुयाच्वनेमाःगु व मेगु जिम्मेवारीइ हिउपाः हयेमाःगु खँ कनादिल ।

नेवाः देय् दबूया संरक्षक लक्ष्मण राजवंशीं न्हूदँ समारोहं नेवाःतय्गु भाषा आन्दोलनया मू लँपु जुयाच्वंगु जुयाः लिपा सरकारी कमिटी जुइगु इलय् थुकिं ज्या याइ कि मयाइ धइगु खँ आः हे विचाः यायेमाः धयादिल। ज्यापु महागुथिया मूछ्यांज्ये अनुप सिंह सुवालं समितिया दुजःपिं व्यक्ति विशेष जुइ मजिउगु खँ कुलादिसें खुला न्ह्यः हे समिति नीस्वनेमाःगु खँ न्ह्यथनादिल। नेपाः राष्ट्रिय पार्टीया नायः डा. केशवमान शाक्यं समिति नीस्वनेगु नापं ताः ई ज्या यायेगु लागिं मेगु नं छगू समिति स्वनेमाःगु विचाः प्वंकादिल ।

मुँज्यापाखें थौं हे संयोजन पुचःया मुँज्या च्वनाः न्हूदँ समारोह समिति गठन यायेगु बारे सहलह ब्याकेगु निर्णय नं याःगु दु ।