नेपाःमिया कारणं ब्रिटिश प्रमया आलोचना
येँ (सन्ध्या टाइम्स)/बेलायती प्रधानमन्त्री डेविड क्यामरुन थौंकन्हय् थःथाय् ज्या याइम्ह छम्ह नेपाःमि मिसाया कारणं थःगु हे सरकार दुने आलोचित जुयादीगु दु ।
खँ छु धाःसां प्रम क्यामरुन व वय्कःया कलाः समन्था क्यामरुनं छुं दँ न्ह्यः शारीरिक अपांगता दुम्ह थः काय इभानया सुसाःकुसाः यायेत नेपाःमि मय्जु गीता लामायात ज्याय् तःगु जुयाच्वन। सन् २००९ लय् प्रम क्यामरुनया काय इभान मंत। वयां लिपा गीतां थःत बेलायतय् स्थायी रुपय् च्वनेगु भिसा बी माल धकाः अनया गृह मन्त्रालयय् निवेदन तल खनिं। उगु निवेदनय् प्रम क्यामरुनया नं समर्थन दु। तर बेलायती सरकारं छुं ई न्ह्यः तिनि बेलायतय् गैरयुरोपेली आप्रवासी म्हो यायेगु ताः तयाः सुयातं नं स्थायी भिसा मबीगु छगू कानून प्रस्ताव यानातःगु जुयाच्वन। थुकिं यानाः प्रम क्यामरुनं छखे देशय् थज्याःगु कानून हयेगु धकाः प्रस्ताव तयेगु, मेखे थःथाय् ज्या याइम्ह मिसायात स्थायी भिसाया लागिं निवेदन नं तयेकेगु निखें त्यःगु ज्या छाय् यात धकाः वय्कःया आलोचना शुरु जूगु दु। आलोचकतय्सं प्रमयात थःगु सरकारं छु ज्या यानाच्वन धइगु तकं जानकारी मदुगु खः लाकि धकाः नं न्ह्यसः तयाहःगु दु ।
