विज्ञ पुचः दयकेगु सहमति

येँ (सन्ध्या टाइम्स)/अर्थमन्त्री वर्षमान पुनं राज्य पुनर्संरचना यायेगु निंतिं विज्ञतय्गु पुचः दयेकेगु सहमति जुइधुंकूगु खँ कनादीगु दु। यलय् थौं छगू स्कूलया बार्षिकोत्सवया लसताय् ग्वसाः ग्वःगु ज्याझ्वलय् न्ववासें वय्कलं थ्व जानकारी बियादीगु खः। मन्त्री पुनं न्हूगु संविधान निर्माणया नितिं सहमति याये ल्यं दनिगु मू मुद्दाया रुपय् दुगु राज्य पुनर्संरचनाया विषययात कयाः ततःधंगु फुक्क पार्टीया दथुइ विज्ञ पुचः दयेकेगु सवालय् सहमति जुइधुंकूगु खँ कनादीगु खः। वय्कलं द्वन्द्वया कारणं देशय् विकास जुइ मफयाच्वंगु खः धासें मुलुकया विकास व जनचाहना कथं हे न्ह्याथे यानाः जूसां नं शान्ति प्रक्रिया व संविधान निर्माणया ज्यायात पूवंकां त्वःतेगु नितिं एकीकृत माओवादी पार्टी तयार जुयाच्वंगु दु धकाः नं धयादिल ।