क्वथा मदयाः कैदीयात पिने हे 'कुना तल'

येँ/क्षमता स्वयां अप्वः कैदी कुनातःगु कारणं यानाः धनकुटाया जेलय् कैदीतय्त च्वनेगु व नयेगु समस्या जक वःगु मखु आः ला थवंथवय् ल्वापु जुयाः जेल दुने असुरक्षा समेत पिहां वःगु दु। कैदीत अप्वः व क्वथा कम जूगु कारणं द्यनेगु समस्या जुयाः कैदीतय् दथुइ थवंथवय् ल्वापु समेत जुया वःगु दु। बन्दीत च्वनेगु बिस्कं बिस्कं क्वथा मदयाः कैदीतय् दथुइ ल्वापु समेत जूगुलिं छम्ह कैदीयात वंगु लत्या न्ह्यवंनिसें जेलरया क्वथा पिने हे ल्हातय् न्यवः न्ह्याकाः तयातःगु दु। ज्यान मुद्दाय् लानाः जेलय् कुना तःम्ह धरानया जञ्जु श्रेष्ठ नांयाम्ह उम्ह कैदीयात ल्वापु जुयाः मेपिं कैदीतय्सं दुने हे दुमकासेंलि वयात तयेगु थाय् मदयाः उकथं ल्हातय् न्यवः न्ह्याकाः जेलरया क्वथा पिने हे तया तःगु खः। वंगु भदौ १२ गते मेपिं कैदीतलिसे वयागु ल्वापु जूगु खः। ल्वापु लिपा निगू पक्ष दथुइ सहलह याःबलय् मेपिं कैदीत वयागु विपक्षय् वंगुलि. १४ गते निसें वयात सुरक्षाया कारणं थीथी थासय् तयेगु ज्या जुया वयाच्वंगु खँ धनकुटाया जेलर नरेन्द्र आचार्यं कनादिल।
जिल्ला कारागार धनकुटाय् थौंकन्हय् ४१ म्ह कैदीत कुनातःगु दु ।