प्रभु साहया राजीनामा सकारात्मक पलाः

विपक्षीतय्सं पंगः थनाच्वंगु कारणं अन्ततः माओवादीपाखें सरकारय् वनाच्वंम्ह भूमिसुधार मन्त्री प्रभु साहं थःगु पदं राजीनामा बियाः प्रधानमन्त्रीयात अःपुका बिउगु दु। काशीनाथ तिवारीया हत्याय् ल्हाः दु धकाः प्रहरीया रिपोर्ट वःगु खँयात कयाः विपक्षीतय्सं विरोध यायेवं वय्कलं राजीनामा बियादीगु खः। थ्व वय्कःया तसकं च्वछाय्बहःगु ज्या खः। थज्याःगु नैतिकता भविष्यय् थौं वय्कःया राजीनामा फ्वनाच्वंपिं विपक्षी पार्टीतय्सं नं प्रदर्शन यात धाःसा उकिं देशय् बांलाःगु हे परम्परा बसे जुया वनीगु आशा यायेफु। माओवादीपाखें वय्कःया राजीनामा कयाः नं वय्कःयात बियातःगु द्वपंयात धाःसा अस्वीकार यासें थः कार्यकर्ताया रक्षा यायेगु ज्या नं याःगु दु। हत्याया द्वपं लाःम्ह माओवादी मन्त्रीया थ्व राजीनामां मेगु मखुसां कम से कम पत्रकारयात स्यायेगु कुतः याःम्ह युथ फोर्सया नेतायात सुचुका तःगु पाय्छि जू धकाः सुचुकूम्ह कार्यकर्तायात स्याबासी बियाः अपराधीकरणयात 'बढावा' बियाच्वंपिं विपक्षी एमालेया नेतातय् दिमागय् जल्ल थीगु मत च्याका बी धकाः आशा यायेफु ।

विपक्षीतय्सं भूमिसुधारमन्त्री प्रभु साह लिसें रक्षामन्त्री शरतसिंह भण्डारीं राजीनामा बीमाः धकाः माग याःगु खः। साहया राजीनामा लिपा भण्डारीयात नं राजीनामा यायेत दवाव सिर्जना जुइगु स्वाभाविक खः। थःत वःगु आरोप गलत हे खःसां थःगु अडान स्पष्ट यासें पदया लोभ त्वःताः राजीनामा बियाबिल धाःसा भण्डारीया प्रतिष्ठा अझ थहां वनीगु खइ। थ्व ई थःपिनि लागिं पद तःधंगु खँ मखु, शान्ति व संविधान तःधंगु खँ खः धकाः पुष्टि याना वनेगु ई खः ।

More Stories Like this