निम्ह मन्त्रीतय्सं राजीनामा मबिउगु धासें संसदय् अवरोध
रक्षामन्त्री शरदसिंह भण्डारी व भूमिसुधार मन्त्री प्रभु शाहं राजीनामा मबिउगु धासें प्रतिपक्षी दलतय्सं आइतवाः च्वंगु व्यवस्थापिका संसदया मुँज्याय् नं अवरोध याःगु दु ।
संसदया मुँज्या सुरु जुइवं नेपाली कांग्रेस व नेकपा (एमाले)या नेतातय्सं निम्ह मन्त्रीतय्सं अझ नं राजीनामा मबिउगु व प्रधानमन्त्री नं उकिया बारे संसदय् लिसः मबिउगु धासें संसद न्ह्याकेमबिइगु खँ धाःगु खः ।
कांग्रेस सभासद् मोहमद आफताव आलम व एमाले सभासद् भीम रावलं हिन्दु युवा संघया नायः काशीनाथ तिवारीया हत्याया द्वपः लाम्ह भूमिसुभार मन्त्री व देय् टुक्रा जुइफु धकाः अभिव्यक्ति बिउम्ह रक्षामन्त्री भण्डारीया अभिव्यक्ति तसकं खेदजनक जूगु धासें कुंखिंगु खः ।
निम्ह नेतातय्सं न्ववायेवं कांग्रेस, एमाले लगायत दलया सभासद्त थःथःगु थासं दनाः मुँज्याय् अवरोध याःगु खः । अवरोध यायेवं संसदया मुँज्या सोमवाः तकया निंतिं स्थगित याःगु खः ।
