साहयात लित सःतेगु निर्णय
'औपचारिकता जक ल्यं दनि'
येँ (सन्ध्या टाइम्स)/काशीनाथ तिवारीया हत्याकाण्डय् संलग्न दुगु द्वपं लानाच्वंम्ह भूमिसुधार तथा व्यवस्था मन्त्री प्रभु साहयात एकीकृत माओवादीं सरकारपाखें लित सःतेगु निर्णय याःगु दु। माओवादीया थौं च्वंगु केन्द्रीय पदाधिकारीया बैठकं पार्टीया पोलिटब्यूरो दुजः साहयात मन्त्रीमण्डलं लित सःतेगु निर्णय याःगु खः ।
थौं सुथय् माओवादी अध्यक्ष प्रचण्ड निवास नयाँबजारय् च्वंगु केन्द्रीय पदाधिकारीया बैठकं उगु निर्णय याःगु खः। मन्त्री साहयात सरकारं लित सःतेगु निर्णय याःसां वय्कःयात बियातःगु हत्या काण्डया द्वपंयात धाःसा पार्टीगत रुपं खण्डन यासें उकी वय्कःया संलग्नता मदु धकाः अडान नं काःगु दु। प्रधानमन्त्रीया प्रेस सल्लाहकार रामरिझन यादवं संचारकर्मीलिसे खँल्हासें व्यवहारिक रुपं वय्कः पदमुक्त जुइ धुंकूगु जूसां औपचारिक प्रक्रिया धाःसा ल्यं दनि धयादीगु दु ।
म्हिगः बहनी प्रधानमन्त्री निवास वालुवाटारय् च्वंगु माओवादी व मधेसी मोर्चाया बैठकं निम्हं मन्त्रीतय्गु विषयसं सम्बन्धित दलतपाखें हे निर्णय यायेगु धकाः सहमति जूगु खः ।
उखे मधेसी जनअधिकार फोरम लोकतान्त्रिकं नं रक्षामन्त्री शरदसिंह भण्डारीया विषययात कयाः थौं हे निर्णय याइ धाःगु दु ।
प्रमुख प्रतिपक्षी दल नेपाली कांग्रेस व एमालें साह व भण्डारीयात बर्खास्त यायेमाःगु माग यासें छुं दिं न्ह्यः संसदया बैठक तकं अबरुद्ध याना बिउगु खः। नापं एमालेया भातृ संगठनतय्सं सतकय् प्रदर्शन यानाः नं वय्कःया राजीनामा माग याना वयाच्वंगु दु। कांग्रेस व एमालें हत्या काण्डय् ल्हाः दुम्ह मन्त्री साह व तराईया २२ जिल्ला नेपालं अलग जुइ धकाः अभिब्यक्ति बियादीम्ह रक्षामन्त्री भण्डारीयात बर्खास्त मयातले संसद चले याके बी मखु धाःगु दु। संसदया बैठक नं थौं हे च्वनेत्यंगु दु। सरकारं थौंया संसदये हे उकिया जानकारी बीगु खँ दु ।
