नेमकिपायात नेवाः संघर्ष समितिया आपत्ति
येँ (सन्ध्या टाइम्स)/नेपाल मजदुर किसान पार्टीया केन्द्रीय सचिव लिसें सभासद् सुनिल प्रजापतिं नेवाः स्वायत्त राज्य पलिस्थाया निंतिं न्ह्याकाच्वंगु आन्दोलनयात राष्ट्रिय विखण्डनकारी व भारतीय विस्तारवाद एवं विदेशी ध्यबाया बलं संचालन जुयाच्वंगु धकाः बिउगु द्वपंयात कयाः नेवाः स्वायत्त राज्य मंकाः संघर्ष समितिं आपत्ति प्वंकूगु दु ।
मंकाः संघर्ष समितिया नायः नरेश ताम्राकारं म्हिगः छगू प्रेस विज्ञप्ति पिथँसें छुं दिं न्ह्यः ख्वपय् जूगु नेपालभाषा साहित्य तःमुँज्याय् नेमकिपा नेता प्रजापतिं उगु अभिव्यक्ति बियादीगु खःसा उकिया प्रति घोर आपत्ति प्वंकुसें संघर्ष समितिं विरोध याःगु खः ।
विज्ञप्तिइ धयातःगु दु, 'वय्कःया उगु द्वपं अत्यन्त निम्नस्तरीय, राजनीतिक रुपं दिवालीयापन व निर्लज्जतापूर्ण व्यवहारया प्रतिबिम्ब खः, नेवाः समुदायया भावना व चाहनाय् घाः लाकेगु कथंया अज्याःगु अभिब्यक्ति बिउगु धइगु उगु पार्टी व वय्कः हे संघीयता, लोकतान्त्रिक गणतन्त्र व नेवाः स्वायत्त राज्यया पक्षय् संघर्ष याना वयाच्वंपिं नेवाःतय्गु दथुइ नांगां जुयाः क्यंगु दु ।'
मंकाः संघर्ष समितिं उज्वःगु कथंया ज्या इलय् हे भिंकेगु ज्या मयात धाःसा कन्हय् जनतां हिसाब फ्वनी धकाः सरोकारवालायात सचेत याःगु दु ।
थ्वहे दथुइ मंकाः संघर्ष समितिं उगु अभिब्यक्तियात कयाः नेपाल मजदुर किसान पार्टीया सचिव नापं उगु पार्टीया सभासद् सुनिल प्रजापतियात छुं दिं दुने हे नापलाः वनीगु जूगु दु ।
