ल्वापु छिउँ वंपिं प्रहरीतय्त खुकुरीं पाला हल
येँ (सन्ध्या टाइम्स)/बाग्लुङय् निथ्वः मनूतय् दथुइ जूगु ल्वापु छिउँ वंपिं निम्ह प्रहरीतय्त हे खुकुरीं पालाः घाःपाः याना बिउगु दु। घाःपाः जूपिं प्रहरी जवान दिपेन्द्र शुक्ला व मुकेश हरिजन खः। बाग्लुङ नगरपालिका वडा नं. ३ स्थित सन्तोष नेपालीया छेँय् ल्वापु जूगु खबर वयेवं ल्वापु छिनेत वंगु चान्हय् उपिं निम्हं प्रहरीत उखे वंगु खः। तर सन्तोष पक्षया पुचलं आक्रमण यानाः उपिं प्रहरीतय्त घाःपाः याना बिल। घाःपाः जूपिं प्रहरीतय्त धौलागिरी अञ्चल अस्पताल बाग्लुङय् वासः याकातःगु दु। प्रहरीयात आक्रमण याःगु द्वपनय् नेपाली, वया मां लक्ष्मी, केहेँ जमुना बोहोरा, पासा शेरबहादुर गुरुङ व गंगा गुरुङयात ज्वनाः प्रहरीं अनुसन्धान न्ह्याकाच्वंगु दु ।
चां ल्हानाः स्वम्ह सित
थौं सुथय् सिराह जिल्लाया वस्तीपुर धाःगु थासय् चा काःवंपिं स्वम्ह मनू चां ल्हानाः सीगु दु। कर्जन्हा गाविसया ४५ दँ दुम्ह जय यादव, वय्कःया १३ दुम्ह म्ह्याय् रिंकु व गौतारी गाविसया छट्टुप्रसाद दुनवार सीगु खः ।
