नेवाः लक्ष्मी द्यः दुगु वहःया पाँय्म्वः पितब्वज्या
येँ (सन्ध्या टाइम्स)/'पाँय्म्वः पिथना पुचः-११३१'या ग्वसालय् म्हिगः छगू ज्याझ्वःया दथुइ नेवाः लक्ष्मी द्यःया किपा दुगु वहःया पाँय्म्वः पिथनेगु ज्या जुल। उगु वहःया पाँय्म्वलय् छखे नेवाः पहःया लक्ष्मी द्यःया किपा व मेखे पिथना पुचःया नां कियातःगु दु। पाँय्म्वः थाकुलि आनन्द शाक्य नापं स्वम्हेस्यां मंकाः कथं विमोचन जूगु खः ।
पुचःया दुजः प्रबोध कसां नेवाःतय्सं नेवाः पहःया लक्ष्मी द्यः ल्वःमंकाः मेकथंया हे लक्ष्मी द्यः पुज्यायेगु चलन जुयाच्वंगुलिं नेवाः पहःया लक्ष्मी द्यः लुमंकेगु ताः तयाः थुगु नेवाः लक्ष्मी द्यःया किपा दुगु वहःया पाँय्म्वः पिथनागु खँ कनादिल। वय्कलं पाँय्म्वः मियाः वःगु लबःपाखें जनबहाः सुचुकुचु यायेगु ज्याय् छ्यलेगु खँ नं कनादिल ।
ज्याझ्वलय् पुचःया सल्लाहकार निलकाजी शाक्यं चिचीधंगु ग्वाहालिं हे तःधंगु ज्या जुइ धासें जनबहाः द्यःया दिगी छेँ दयेकेगु ज्या जुयाच्वंगु जानकारी नं बियादिल। आर्थिक ग्वाहालि यानादीपिं पीखुम्हेसित खादां क्वखायेकाः हनेज्या नं जूगु खः। पाँय्म्वः पिथना पुचःया कजि विजय श्रेष्ठया सभापतित्वय् न्ह्याःगु उगु ज्याझ्वलय् छ्याञ्जे संजिव शाक्यं लसकुस यानादीगु खःसा नरेश महर्जनं सुभाय् बियादीगु खः। पितब्वज्या जूगु पाँय्म्वः झिगु ग्रामया खःसा उकिया मू झिंस्वसःत्या तयातःगु दु ।
