नेपाल संवत्या न्हूदँ राज्यं नं हनेमाः

नेपाःया राष्ट्रिय संवत् नेपाल संवत्या न्हूदँयात थुगुसी राज्यपाखें हे हनेगु कथंया तयारी न्ह्यानाच्वंगु खँ पिहां वःगु दु। ताःई न्ह्यवंनिसें नेपाल संवत्या आन्दोलनय् सक्रिय न्ह्यलुवातय्सं प्रधानमन्त्री डा. बाबुराम भट्टराईयात थुकिया लागिं इनाप याःबलय् प्रमं सकारात्मक लिसः बिया हःगुलिं आः नेपाल संवत्या न्हूदँ राज्यं हनीगु सम्भावना पिहां वःगु खः ।

नेपाल संवत्यात राष्ट्रिय संवत् खः धकाः घोषणा यायेगु जक मखु थुकिया प्रवर्तन शंखधर साख्वाःयात राष्ट्रिय विभूतिया मान्यता बीगु ज्या तकं नेपाः सरकारं यायेधुंकूगु दु। तर राज्यपाखें घोषणा याः कथं व्यवहारय् धाःसा खास छुं हे यानाच्वंगु मदु। नेपाल संवत्या न्हूदँ क्यनीगु न्हि कुन्हु सरकारी बिदा बीमाः धकाः आन्दोलनकारीतय्सं माग यातं नं सरकारं न्यनाच्वंगु मदु। नेपाल संवत्या न्हूदँ कुन्हु नं बिदा बीगु धकाः थप छगू घोषणा जक याःसा याःगु ज्या खः थ्व। छाय्धाःसां म्हपुजा कुन्हु सरकारं 'गोवर्धन' पुजा धकाः बिदा बीगु याना हे तःगु दु। नेपाल संवत्या बिदा धकाः छझ्वःया निर्णय यायेत तकं आनाकानी यानाच्वंगु कारणं राज्यं थ्व संवत्यात राष्ट्रिय संवत् धकाः यानातःगु घोषणा नं औचित्यहिन थें जुयाच्वंगु दु। नेपाल संवत् राष्ट्रिय संवत् जूगुया आभास जुयाच्वंगु मदुनि। थुकियात धाथें राष्ट्रिय संवत् कथं छ्यलाबुलाय् हे हयेगु खःसा थुकिया न्हूदँ राष्ट्रं हे हनेगु, वकुन्हु विदा बीगु, सरकारी लेटरप्याडय् थ्व संवत् नं छ्यलेगु थेंज्याःगु ज्याखँत सरकारं यायेमाः। यदि थुगुसी सरकारं हे थ्व संवत्या न्हूदँ हनेगु ज्या यात धाःसा राज्यं उखेपाखे धाथें पलाः छित धकाः तायेके फइगु खइ ।

More Stories Like this