आपालं प्रतिभा दुम्ह कलाकार भोगेन्द्र

शीला साय्मि

नेपालभाषाया आपालं टेलिसिरियल मध्ये दकलय् मध्ये लोकंह्वाःगु टेलिसिरियल 'ख्वताबजि' खः। न्ह्यइपुगु व नासलं लीगु जुयाः नं अप्वः स्वकुमितय्सं थुकियात ययेकू। थुकी दुनेया छम्ह तसकं लोकंह्वाःम्ह कलाकार खः भाजु भोगेन्द्र मानन्धर ।

ख्यालः म्हितेगु, प्याखं हुलेगु, समाः यायेगु, चर्या नृत्य यायेगु, हुलाप्याखं स्यनेगु आदि थीथी प्रतिभा दुम्ह वय्कलं थीथी संकिपाय् नं म्हितादीगु दु। जिपिं बद्मास मखु, याकःम्ह्याय्, जिगु मिखाया न्ह्यःने, मिस पानवती फिल्म नापं मेगु लोकंह्वाःगु टेलिसिरियल 'समय्बजि'इ नं वय्कलं म्हितादीगु दु ।

शिक्षाय् बीएस्सी पास यानादीम्ह वय्कः वि.सं. २०३१ सालय् मां तेजलक्ष्मी मानन्धर व अबु धर्मकृष्ण मानन्धरया कोखं कालीमाटीइ जन्म जूम्ह खः। २०४९ सालंनिसें वय्कलं आधुनिक हुलाप्याखंया प्रशिक्षण कयादिल। २०५३ सालपाखे रमेशपाखें चर्या प्याखं नं सयेकादिल। चर्या दुने मञ्जुश्री छगू प्याखं स्यनेत हे वय्कःयात न्हय्ला बित। वया लिपां कथहं पञ्चबुद्ध, आर्यतारा, अन्नपूर्ण, बज्रयोगिनी, कालभैरब लगायत चर्याया आपालं प्याखं सयेकादिल। उलिमछि चर्या नृत्य सःसां लाखेप्याखं छता धाःसा वय्कलं मन दयाः नं सयेके मखन। अथेनं उगु हे दँय् बसन्तपुली जूगु मानन्धर प्रतिभा साँझय् थःगु प्रस्तुतियात स्वकुमितय्सं बिउगु तालिं वय्कःयात आपालं हःपाः चूलात ।

२०५८ सालय् प्रज्ञाभवनय् जूगु अन्तर स्कूल डान्स कासाय् वय्कलं न्हापांखुसी कालभैरब प्याखं हुलादीगु खः। तर थ्व थुलि थाकुगु प्याखं खः कि वय्कः प्याखं क्वचायेवं अन हे बेहोस जुयादिल। तसकं सने माःगु व हुले नं थाकुगु जुयाः अप्वःसिनं हुले सःसां नं काल भैरव प्याखं हतपतिं ह क्यनेगु मयाः ।

चर्या नृत्य प्रस्तुत यायेगु झ्वलय् वय्कलं बेल्जियम, नेदरल्याण्ड, पोल्याण्ड, भारत, जोर्डन आदि आपालं देय्या भ्रमण नं यानादिल। पिनेयापिं मनूततय्सं नेपाःया चर्या नृत्ययात नेपाःया हे मौलिक हुलाप्याखंया रुपय् कायेगु याः। स्यंवःपिं नं आपालं दयावःगुलिं थौंकन्हय् अमेरिकाय् चर्या नृत्य स्यनीगु संस्था हे चायेकेधुंकूगु दु। चर्या विदेशय् लोकंह्वाःसां स्वय्म नेपालय् धाःसा थुकिया महत्व थूपिं म्हो जक दुगु वय्कःया बिचाः दु ।

थःगु प्रतिभाया बलं वय्कलं आपालं सम्मान व पदकत नं त्याकादीगु दु। इमेज च्यानलया ३०० गू ब्वया लसताय् जूगु ज्याझ्वलय् वय्कः सम्मानित जुयादीगु खः। वय्कलं नेपाल लिपि गुथिं याःगु न्हापांगु भुजिंम्वल लिपि प्रशिक्षणय् न्हाप लाकादीगु खःसा राष्ट्रिय खुलकुद परिषद्या ग्वसालय् जूगु झिक्वःगु राष्ट्रिय जिम्न्यास्टिक कासाय् नं न्हाप सिरपाः त्याकादीगु खः। स्वदेश जक मखु विदेशय् नं वय्कलं थीथी सिरपाः त्याकादीगु दु ।

थौंकन्हय् वय्कः ख्वताबजि, समय्बजि, चयां नृत्य नापं एभरेष्ट स्कूल ख्वपय् नृत्य प्रशिक्षक, लिंकन स्कूलया जिम्न्यास्टिक शिक्षक, व निशान जिम्न्यास्टिक क्लबया प्रशिक्षक जुया च्वनादीगु दु। तर आपालं प्रतिभाया धनी खयां नं वय्कःया न्हापांगु म्हसीका धाःसा थौंकन्हय् 'ख्वताबजि'या कलाकार कथं हे स्थापित जुयाच्वंगु दु। 'ख्वताबजि'या झिंछगूगु ब्व निसें वय्कः थुकी संलग्न जुयादीगु खः। थःत थुगु ख्यलय् यंकादीम्ह पासा उदेन न्हूसाय्मि व निर्माता सुरेन्द्र तुलाधरप्रति वय्कः आभारी जुयादी ।

नेपालभाषाया आपाः धइथें कलाकारत 'ख्वताबजि' पाखें पिहां वयाच्वंगु दु। उकिं 'ख्वताबजि'यात वय्कलं नेवाः कलाकार व नेवाः सिरियल उत्पादन यायेगु कारखाना हे खः धयादी। थज्याःगु महत्वपूर्ण फिल्मी ज्याझ्वःयात सदां म्वाका तयेगु लागिं नेवाः समाजया हरेक ख्यलं माःगु ग्वाहालि यायेमाःगु वय्कःया बिचाः दु ।

More Stories Like this