मन्त्री प्रभु शाहयात लितसतेगु माओवादी निर्णय
एकीकृत नेकपा (माओवादीं) हिन्दु युवा संघया नायः काशीनाथ तिवारीया हत्याया द्वपं लाःम्ह भूमिसुधार मन्त्री प्रभु शाहयात सरकारं लितसतेगु निर्णय याःगु दु ।
माओवादी नायः पुष्पकमल दाहाल 'प्रचण्डं' आइतवाः छगू विज्ञप्ति पिथनाः मन्त्री शाहयात लितसतेगु निर्णय जूगु खँ धाःगु दु । विज्ञप्तिइ कानुनी उन्मुक्ति दुसां नं शान्ति व संविधानया मूल विषयपाखें ध्यान विकेन्द्रित जुयाः अनावश्यक ई खर्च जुइगु धासें शाहयात लितसतेगु निर्णय जूगु खँ न्ह्यथंगु दु ।
थ्वस्वयां न्ह्यः आइतवाः सुथय् माओवादी पादाधिकारीतय् मुँज्यां शाहयात सरकारं लितसतेगु निर्णय याःगु खः । अथेहे मुँज्यां मेम्ह विवादय् लानाच्वम्ह रक्षा मन्त्री शरदसिंह भण्डारीयात सरकारं चीकेगु बारेया निर्णय यायेगु जिम्मा सम्बन्धित पार्टी व मधेशी मोर्चायात बिइगु निर्णय नं याःगु दु ।
व्यवस्थापिका संसदया मुँज्याय् प्रतिपक्षी दलतय्सं रक्षामन्त्री व भूमिसुधार मन्त्रीयात सरकारं बर्खास्त मयायेकं संसदया मुँज्या न्ह्याके मबीगु ख्याच्वः बियावयाच्वंगु दु ।
