'सुनिल प्रजापतिया अभिव्यक्ति तस्कं निम्न स्तरीय'
नेवाः स्वायत्त राज्य मंकाः संघर्ष समितिं नेपाल मजदुर किसान पार्टीया सचिव नापं सभासद् सुनिल प्रजापतिं नेवाः स्वायत्त राज्य सम्बन्धी बिउगु अभिव्यक्त तसकं निम्न स्तरीय व राजनीतिक दिवालीयापनाया निर्लज्जतापूर्ण व्यवहारया प्रतिबिम्ब जूगु धासें घोर आपक्ति प्वंकूगु दु ।
वंगु कउलाथ्व त्रयोदशी कुन्हु ख्वपय् जूगु नेपालभाषा साहित्य तःमुज्याया झ्वलय् प्रजापतिं नेवाः स्वायत्त राज्य प्राप्ति आन्दोलनयात राष्ट्रिय विखण्डनकारी व भारतीय विस्तावादी नापं विदेशी ध्यबाया आडय् न्ह्यानाच्वंगु धकाः बिउगु द्वः फुक्कं नेवाः समुदायया मंकाः आकांक्षा विरुद्धय् जूगु खँ संघर्ष समितिं धाःगु दु ।
संघर्ष समितिया नायः नरेश ताम्रकारं आइतवाः छगू विज्ञप्ति पिथनाः नेवाः समुदायया भावना व चाहनायात लिच्वः लाकीगु अभिव्यक्तिं प्रजापति व नेमकिपा संघीयता, लोकतान्त्रिक गणतन्त्र व नेवाः स्वायत्त राज्यया पक्षय् संघर्षरत फुक्कं नेवाः समुदायया न्ह्यःने नांगां जूगु न्ह्यथनातःगु दु ।
'नेवाः व नेवाः संस्कृति नापं भाषाया आडय् थुकथं फुक्कं नेवाः समुदायया राजनीतिक अधिकार सुनिश्चिताया आन्दोलन विरुद्ध लक्षित जुयाः लगे जुइपिं थज्याःपिं तत्वत इलय् हे सच्चे मजूसाः कन्हय् जनतां उकिया हिसाव फ्वनी' विज्ञप्ति धयातःगु दु ।
