हलिन्यंक वाल स्ट्रिट कब्जा यायेगु अभियानया प्रभाव

आर्थिक संकटया लिच्वः लाःगु संयुक्त राष्ट्र अमेरिकाय् कर्पोरेट संस्था व अति व्यवसायीकरणया विरोध यासें न्युयोर्कं न्ह्याःगु वाल स्ट्रिट कब्जा यायेगु अभियानया प्रभाव हलिन्यंक लाःगु दु । लच्छि न्ह्याः 'वाल स्ट्रिट कब्जा याः' धकाः सुरु जूगु अभियानया लिच्वः कथं रोम, बर्लिन, पेरिस, सिड्नी, ताइवान, हङकङ, सिउल लगायत आपालं युरोपियन व अफ्रिकन देशय् प्रदर्शन जूगु दु ।

सरकारी सुविधका कटौती नापं धनी व गरीवत दथुइ दुगु अन्तरया विरोध यासें शनिवाः न्युयोर्कय् तःधंगु प्रदर्शन जुल । जुकोटि पार्कय् न्याद्वः मनूत मुनाः टाईम्स स्क्वार्यय् वंगु खः । उगु इलय् प्रहरीं न्हय्म्ह प्रदर्शनकारीतय्त ज्वंगु दु । पीन्याम्हसित टाइम्स स्क्वार्यय् ज्वंगु खःसा मेपिं नीप्यम्हेसित वासिङटन स्क्वार्य पार्क नापसंया सिटिबैंकं ज्वंगु खः ।

उखे इटालिया राजधानी रोमय् जूगु प्रदर्शनय् नं प्रहरीं न्हय्म्हं मल्याक प्रदर्शनकारीतय्त ज्वंगु दु । प्रहरी व प्रदर्शनकारीत दथुइ झडप जुइवं इटालियन प्रधानमन्त्री सिल्भिया बर्लेस्कोनीं उकियात 'ग्यानापुगु संकेट' धासें रोमय् हिंसा ब्वलंकूपिं पत्ता लगेयानाः कारवाही यायेगु धयादिल ।

More Stories Like this