बिदा [चिबाखं]
सुधीर ख्वबि
थौं शनिबाः । अफिस बिदा । छेँ वनेगु तातुनां च्या हे मत्वंसे कोथां पिहाँवल । सरासर बस पार्कय् वन । वया म्हं छम्हं लुमन्तिं झूचाया वयाच्वन । थः कलाःया ख्वाः मखंगु लच्छी दतं मयाये धुंकल । थौं वना कन्हय् अफिसय् हाजीर जूवयेगु वयागु बिचाः । स्वघौतिया जक लँपु खः । उकें याकनं वना वयेगु वयागु धून ।
बस न्हयाँवनाच्वन , थःगु हे तालं । बसया गति सिबें वयागु मनया गति अप्पोया च्वंगुलि वया नुगः पिपिच्याः । उकिसनं थाय् थायस् दिपाः काकां बस न्हयाँवनाच्वंगुलिं व ला लखं पिनेलाःम्ह न्याँ थें इतःमितः ककं बसया सिटय् च्वनां च्वने मफय्क उसिउसि धायाच्वन ।स्वघौ मखु प्यघौति लिपा बल्ल वयागु बस स्टप वल । हथाय् चाचां बसं क्वहां वल । पलाः ततःपलाः याना व थःगु छेँपाखे न्हयात । वयागु तुति न्यासि वनाच्वंगु थें मच्वं , बरु ब्वया वनाच्वंगु थें च्वं । अथे हे बाघौति लिपा थःगु छेँ खने दत । छेँ थ्यंकेगु पित्याः अझ ब्वलना वल । वयागु पलाः झनझन च्वयावल । शायद छेँ प्रतिया मतिना जुइमाः । शहरया जागीर , गामय् छेँय् गुबलें गुबलें जक वनिगु व । थः कलाःयात नं शहर यंकेगु कुतः याःगु खः तर मां बौयात, परिवारयात स्वइम्ह सु धैगु न्हय्सः ब्वलंगुलिं वं थः कलाः यात ब्वनायंके मखना च्वन ।इलय् ब्यलय् व छेँ वनिबले न्हयाबलें वयागु मनस्थिति थथे हे जुइगु । थौं नं वयागु मनस्थिति अथे हे दु । बल्ल छेँ थ्यन । पिनेसं मां बौ नाप लात । तर वयागु सः थ्वलं नं वया कलाःम्ह पिहाँमवः । न्हापा न्हापा जूसा व छेँ थ्यने लाइमखुनि ल्हाःतुति सिलेतः लः ज्वना वयेधुंकिम्ह , थौं छाय् पिहाँ मवल धका मनय् खँ वाय्काः हथासं थः कोथास दुस्वःवन । कोथाय् लासाय् द्यनाच्वंम्ह वया कलाः, व वःगु खना तीजक दनेत स्वल । छाय् छु जुल ? जि झन शनिबाः बिदा लाका वयां ... व दिक्क चाल । वया लागिं थः जहान मफुगु सिबें नं बिदा सितिं वनेत्यंगु पीरं कल । थः भाःतया नुगः खँ थुया, वया नुगः झन चिरीबाःथें जुल । अथेसां वं थः भाःतया नुगः तयेतः स्वल । ज्वर वःगुला म्हो जुइधुंकल उखें थुखें जुइ जक मफुनि का । धन्दा कयादीम्वाः । कलाःम्हं थथे धासेंलि वया ख्वाः चकन ।
बहनि जा नये सिधय्का द्यनेगु सुरसार जुल । व तसकं धर्म संकटय् लात । जितः न्हयः वल धा धां व अंगः पाखे स्वया द्यन । तर , चान्हय्सिया १२ बजे जुल , १ बजे जुल वया न्हयः मवः । उखे मूपुल थुखे मूपुल । ज्वरं हरंत जुया द्यने मफया च्वंम्ह कलाम्हेसियां वयागु मनस्थिति बाँलाक थू । वयागु छटपट खना वं थः भाःतयात ब्वन । न्हयः मवःनि ? थुखे हे स्वयादिसँ । वया ख्वाः चःकनावल । वया ल्हाः उसि उसि सनाहल । म्हं छम्हं करेन्ट ब्वाँय् वं थें जुल । वयागु ल्हातं थः कलाःया म्हय् थ्यूबले व ला थाराक्क न्हुल । गपाय्सकं चुईंचुईं पूगु , चःति नाः नाः वयाच्वंगु । ज्वर ला तसकं वयाच्वन । वं मनमनं विचाः यात । थः घन्टौं बसय् च्वना वयागु खँ लुमन । कन्हय् न्हापनं लिहाँ वने मानिगु नं लुमन । वया विचाः शून्य जुल ।
कलाःम्हेसिया मिखां ख्वबि स्वः स्वः वयेका धर्म ब्याका च्वन ।
Related Stories
अस्तित्वया न्ह्यसः जितः स्यायेतः कुतःयाम्हसितः स्वांमाः क्वखायेकुगु इलय्... फेसबुक च्याट मतिनाया सवाःMore Stories Like this
बाखं च्वये मखुनी परिवेश (मुक्तक बाखं) बायावंगु लँपु हेँग्वाः जूम्ह मनू ब्लू-डल बाखं ब्वनेधुंकाः
