राज्यं हे न्हूदँ हनीगु सम्भावना

सरकारी न्हूदँ समारोह समिति दयेकेत आग्रह

येँ (सन्ध्या टाइम्स)/नेपाल संवत्या न्हूदँ हनेगु लागिं थुगुसी सरकारपाखें हे राष्ट्रियस्तरया न्हूदँ समारोह समिति गठन याइगु सम्भावना ब्वलंगु दु। नेपाल संवत् नेपाःया राष्ट्रिय संवत् खः धकाः राज्यं स्वीकार यायेधुंकूगु कारणं थुकिया न्हूदँ हनेगु ज्या नं राज्यपाखें यायेमाः धइगु थ्व संवत्या आन्दोलनकारीतय् मागयात सकारात्मक रुपं कासें प्रधानमन्त्री डा. बाबुराम भट्टराईनं थुकिया बारे मन्त्रिपरिषद्य् सल्लाह यायेगु बचं नं बियादीगु दु ।

नेवाः देय् दबूया नायः नरेश ताम्राकारया नेतृत्वय् थौं वालुवाटार वंगु प्रतिनिधिमण्डललिसे खँ ल्हासें प्रम भट्टराईनं थ्व आश्वासन बियादीगु खः। थुकिया लागिं माःगु गृहकार्य यायेत वय्कलं महान्यायाधीवक्ता मुक्ति प्रधान व माओवादी न्ह्यलुवा पंचलाल महर्जनयात जिम्मा नं बियादीगु दु ।

नेवाः देय् दबूया नायः नरेश ताम्राकारं थौं 'सन्ध्या टाइम्स'लिसे खँ ल्हासें प्रमं थुकिया बारे याकनं लिसः बी धयादीगु खँ नं कनादिल। वय्कलं धयादिल, 'नेपाल संवत्यात राष्ट्रिय मान्यता बीधुंकाः उकिया न्हूदँ हनेगु ज्या नं राज्यया हे दायित्व खः धइगु खँयात प्रमं सकारात्मक रुपं कयादीगु दु ।'

आइतवाः मंकाः खलःया न्हूदँ समिति
नेपाल संवत् ११३२ न्हूदँयात राष्ट्रिय स्तरं हनेगु बारे सहलह यायेगु व न्हूदँ समारोह समिति नं गठन यायेत नेपालभाषा मंकाः खलकं कंस आइतवाः छगू मुँज्या सःतूगु दु। मंकाः खलःया छ्यांज्ये नरेशवीर शाक्यं सःतादीगु उगु मुँज्याय् मंकाः खलःपाखें दँय्दसं न्हूदँ हनेत नीस्वनेगु याना वयाच्वंगु न्हूदँ समारोह समितियात हे राष्ट्रिय रुप बिया यंकेगु बारे सहलह जुइगु खँ धाःगु दु। येँया तलेजु पार्टी प्यालेसय् न्हिनय् उगु मुँज्या च्वनेगु खँ धाःगु दु ।