थौं शोकमग्न सिन्धुली बजाः बन्द
येँ (सन्ध्या टाइम्स)/सिन्धुलीया पुलांगु झँगाझोली धाःथाय् म्हिगः बस दुर्घटना जुयाः आपालं मनू सीगु शोकय् थौं सिन्धुलीया बजाः व यातायात बन्द याःगु दु। उद्योग वाणिज्य संघ सिन्धुलीपाखें दुर्घटनाया शोक माने यायेत थौं छन्हु पसः, बजाः, कलकारखाना व संघसंस्था तकं बन्द यायेत इनाप याः कथं थौं बन्द जूगु खः। दुर्घटनाय् लानाः थःगु लागाया आपालं मनू सीगु कारणं सिन्धुली बजाः हे शोकग्रस्त जुयाः सुनसान जुयाच्वंगु दु। सीपिनि छेँजःपिनि दथुइ तःधंगु शोक व दुःख व्याप्त जुयाच्वंगु दु ।
सिन्धुलीं येँपाखे वयाच्वंगु उगु बस दुर्घटनाय् लानाः आः ४२ म्ह मनूया ज्यान वंगु खः। सीपिं आपालं मनूतय् सनाखत जुइ मफुनि। लाश फुक्कं अन हे चौरय् तयातःगु दु। थौं नं थप खुम्ह मनूया लाश सनाखत जूगु दु। लाश म्हसिउलिसे यंकेगु क्रम जारी दु ।
