एनआरएनय् जीवा लामिछाने निर्विरोध

येँ (सन्ध्या टाइम्स)/गैर आवासीय नेपाली संघ एनआरएनया अध्यक्ष पदय् जीवा लामिछाने निर्विरोध निर्वाचित जुयादीगु दु। अध्यक्ष पदया लागिं थौं चुनाव यायेगु तयारी जुयाच्वंगु खःसां मेम्ह प्रतिस्पर्धी एवं वर्तमान नायः देवमान हिराचनं थःगु नां लित कायेवं भाजु लामिछाने निर्विरोध निर्वाचित जुयादीगु खः। चुनावय् निम्हेसिया दथुइ कडा प्रतिस्पर्धा जुइगु संकेत खने दयाच्वंगु खः। थ्वहे इलय् संगठनया संस्थापक नायः लिसें संरक्षक उपेन्द्र महतोया पहलय् हिराचनया नां लित कायेकेगु ज्या जूगु खः। लामिछाने रुसय् उद्योग व्यवसाय संचालन याना वयाच्वंम्ह खः। वय्कः निर्वतमान उपाध्यक्ष नं खः। वय्कलं थःगु कार्यकालय् संस्था बल्लाकेगु धयादीगु दु ।