गणविहारय् महान कथिनदान
येँ (सन्ध्या टाइम्स)/गण महाविहारया प्रमुख सोभित भन्तें वर्षावास क्वचायेका बिज्याःगु लसताय् गणमहाविहारय् पवित्र कथिनदान महोत्सव जुल। दाता अ.विर्यपारमी, सानुमाया महर्जन लगायत छेँजःपिंसं संघनायक भिक्षु अश्वघोष महास्थवीरं पञ्चशील प्रार्थना यानाः न्ह्याकाबिज्याःगु उगु ज्याझ्वलय् वसपोलं धर्म देशना नं यानाबिज्याःगु खः। चारुमती बुद्धिष्ट मिसनया नायः भिक्षु तपस्वीधम्मपाखें बुद्धपुजा यानाबिज्याःगु उगु ज्याझ्वलय् न्यय्न्ह्यम्ह उपासक उपासिकापिंसं अष्ट परिष्कार दान यानादीगु खः ।
विहार प्रमुखे सोभित भन्तेपाखें अष्ट परिष्कारपाखें प्राप्त जूगु दानदक्षिणा लुम्बिनीइ निर्माण जुइत्यंगु अखिल नेपाल भिक्षु महासंघया बौद्ध विहार निर्माणय् छ्यलीगु लिसें विहार निर्माणया निंतिं आर्थिक ग्वाहालि यायेत विशेष इनाप यानाबिज्यात ।
ज्याझ्वलय् अखिल नेपाल भिक्षु महासंघया नायः बोधिसेनं महास्थवीर, भिक्षु गुणघोष महास्थवीर, भिक्षु सुमेघ धीर सुधिरा, भिक्षु आनन्द महास्थवीर, भिक्षु संघरक्षित, भिक्षु भद्दीय लगायत सछिम्ह भिक्षु व अनागारीकापिं व मेपिं आपालं उपासक उपासिकापिनि उपस्थिति दुगु खः।
ज्याझ्वःया दथुइ भिक्षु अश्वघोष महास्थविर न्हूम्ह संघनायक जुयाबिज्याःगु लसताय् विशेष भिंतुना पौ लःल्हायेगु लिसें सञ्चारकर्मीतय्त नं लुमन्ति चिं लःल्हाःगु खः ।
