लोभ, लापर्वाही व हथाय्या लिच्वः

बर्खाया इलय् नेपाःया राजमार्गय् अप्वः गाडी दुर्घटना जुइगु याः। बर्खा धुंकाः थ्वहे मोहनि सिधःगु ताकाय् नं झीथाय् गाडीत दुर्घटनाय् लाइगु जुयाच्वंगु दु। आः नकतिनि हे नं सिन्धुली-बर्दिवास निर्माणाधिन लँपुइ छगः बस दुर्घटना जुयाः ४० स्वयां अप्वः मनूतय् ज्यान वंगु दु। थ्व दुर्घटनाया अझ मेगु दुःखद् पक्ष छु धायेबलय् थ्व गाडी नकतिनि क्वचाःगु मोहनि नखः न्यायेकाः येँपाखे लिहां वःपिं यात्रु ज्वनाः वयाच्वंगु खः। मोहनि न्यायेकाः वयाच्वंपिं ४० स्वयां अप्वः नेपाःमि छगू हे थासय् लानाः सीगु थ्व दुर्घटनां सम्पूर्ण नेपाःमितय्त मोहनिया लसता व न्ह्यइपु हे ल्वःमंक दुःखित याना बिउगु दु। थ्व सकल देशया लागिं हे शोकपूर्ण दुर्घटना खः ।

मोहनि सिधयेवं मनूत हानं थःथःगु ज्याय् लिहां वने हथाय् चाइ। मोहनि न्यायेकेत उपिं गथे बसयात धाक्व ध्यबा पुलाः छेँय् वनीगु खः लिहां वइबलय् नं अथे हे धाक्व पुलाः जक मखु गन गन छिं अन अन च्वनाः यात्रा याना वइ। यातायात व्यवसायी व मजदूरतय् लागिं थ्व छगू जिक्व कमे यायेगु अवसर जुयाच्वंगु दु। वास्तवय् व्यवसायीतय् छुं भचा ध्यबाया लोभ व यात्रुतय् लिहां वनेगु हथाय्या लिच्वः कथं थुज्वःगु दुःखद् दुर्घटना जुइगु खः। थज्याःगु दुर्घटनातय्त वास्तवय् छुं भचा कडाई यात धाःसा पने मफइगु मखु। थुकी यात्रु, व्यवसायी व प्रशासन स्वंगुलिं निकाय सतर्क जुइमाः। गाडीइ क्षमता स्वयां अप्वः यात्रु मतयेगु, यात्रुतय्सं नं उकिया लागिं दवाव मबीगु व तया हल धाःसा प्रशासनं तुरुन्त हे कारवाही न्ह्याकेगु जुल धाःसा यात्रा सुरक्षित जुइगु खँय् शंका मदु ।

More Stories Like this