निम्ह मन्त्रीतय्त चीकेत एमालेया माग
नेकपा (एमालें) वर्तमान मन्त्रिपरिषदय् दुथ्याःपिं रक्षामन्त्री शरदसिंह भण्डारी व भूमिसुधार मन्त्री प्रभु शाहयात तत्काल मन्त्री पदपाखें चीकेत माग याःगु दु ।
प्रधानमन्त्री डा. बाबुराम भट्टराई लगायत माओवादी नेतात नाप शुक्रवाः जूगु खँल्हाबंलाय् एमाले नेतातय्सं निम्ह मन्त्रीतय्त पदं चीकेत माग याःगु खः । एमालें निम्ह मन्त्रीयात पदबहाल यानातःसा प्रधानमन्त्रीया स्वच्छ छवी दाग लाइगु व माओवादी पार्टीयात नं नकारात्मक लिच्वः लाइगु खँ न्ह्यथंगु खः ।
रक्षा मन्त्री भण्डारीं देय् टुक्रा जुइफुगु अभिव्यक्ति बिउगु व भूमिसुधार मन्त्री शाहयात हिन्दु युवा संघ पर्साया नायः काशी तिवारीया हत्या काण्डय् प्रहरीं दोषी धकाः द्वपः बियातःगुलिं उकिया बारे प्रधानमन्त्रीं सरकारया स्पष्ट धारणा सहित व्यवस्थापिका संसदय् लिसः बिइत नं एमालें इनाप याःगु दु ।
उगु हे खँल्हाबंलाय् शान्ति प्रक्रिया व संविधान निर्माणया विषयसं नं निगू दलया नेतात दथुइ सहलह जूगु खः । सहलह लिपा माओवादी न्वकु नापं परराष्ट्र मन्त्री नाराणकाजी श्रेष्ठ 'प्रकाशं' थौंया सहलहसं छुं ठोस निर्णय मजूगु व छन्हु-निन्हु दुने हे कांग्रेस लगायत मेमेगू दलनाप सहलह यानाः छगू निष्कर्षय् थ्यनीगु जानकारी बियादिल ।
सिंहदरवारस्थित एमाले संसदीय दलया ज्याकूथी जूगु सहलहया झ्वलय् माओवादी पाखें पार्टी न्वकु नापं प्रधानमन्त्री भट्टराई, परराष्ट्र मन्त्री प्रकाश, मू छ्याञ्जे रामबहादुर थापा 'बादल' व एमाले पाखें नायः झलनाथ खनाल, मू छ्याञ्जे इश्वर पोखरेल, नेता भीम रावल लगातया ब्वति दुगु खः ।
