नत्रसा…

नर्मदेश्वर प्रधान

'भ्वय् नकेगु मखुला' । ब्याहा मयाःपिं ल्याय्म्ह ल्यासेत नाप लाइ । च्वाक्क धाये वइ । हायेके लाइ । थ्व चलन हे जुइ । थौंकन्हय् ला भ्वय् नयेगु त्वह न्हून्हूगु खनेदइ । ब्याहा यानागु न्यय्दँ क्यंगु भ्वय् । पास जूगु भ्वय् । मिसामचातय् इहि बाह्रा भ्वय् थौंकन्हय् धूमधाम कथं जू । मचातय् निदँ बुदिंया भ्वय् ब्याहा भ्वय् थें न्यायेकीपिं नं दु । भ्वय् लय्ता उत्सुकताया प्रतीक खः । नेवाःतय् संस्कृतिइ भ्वय्या महत्व न्हापांनिसें दु । थौंकन्हय् भ्वय् संस्कृतिं न्हून्हूगु लँपु काःगु दु । शैली हिउगु दु ।

थथे धाईपं नं दु । मस्त तःधिकः जुइ । विदेशय् वनी । तापाक । अन हे च्वनी । छेँय् लिहां वइ । ब्याहा याइ । सम्भावना म्हो जुइ । मां अबुपिंसं ब्याहा याकाच्वनी । मच्वनी । छुं निश्चितता दइ मखु । उकिं कय्ता पुजा इहि बाह्रा भ्वय् बांलाक नके । मां बौपिंसं मन तयेत स्वइ । थुज्वःगु तर्क बियाः भव्य भ्वय् न्यायेकी ।

'भ्वय् नकेगु मखुला' । थौंकन्हय् स्वइतं धाये । हायेके । तर धइगु खँ नुगलं वःगु अनुभव जुइ मखु । पिनें हालाच्वनागु थें ताइ । भ्वय् नकेगु मखु ला धात्थें सःती । सःतूथाय् वने हे माल । उपहार ज्वनां वने मालाच्वनी । उपहारया खँ मखु । थौंकन्हय् भ्वय् वने अःपु मजू । मनूत थौंकन्हय् सुं गन सुं गन जुइ धुंकल । न्हापा न्हापा च्यागू-झिगू त्वाः दुने थःथितिपिं दयाच्वनी । वये-वनेत थाकुइ मखु । ई ब्यया समस्या जुइ मखु । आः अथे मखु । थःथिति पासापिं फुक्क तातापाक चिच्चा दनेधुंकल । भ्वय् सःती । वनेमाल । थाय् गनया गन जुयाच्वनी । न्हू न्हूगु भ्वय् छेँ । गुलिं सुदूर उत्तरय् । गुलिं तापाक पश्चिमय् । वये-वनेत थाकुइ । बहनी । थाय् लुइके थाकुइ । मतया ठेगाना दइ मखु । भ्वय्या कार्ड खंसांनिसें म्ह झ्यातुसे च्वनी… गय् वनेगु… ! लिहां गय् वयेगु । तःधंगु हे झन्झट फयेमाली । भ्वय् नकेगु मखुला थौंकन्हय् थथे धाये ग्याः । मसःतूसां जिउ थें ताइ । वय्-वनेगु झन्झट लुमनी । वनेम्वाःसा जिउ । मनं तायेका च्वने । तर स्याःन्याःपिंथाय् गय् त्वःफिकीगु ।

छखे झन्झट धाये । मेखे थःत सुनां नं सःते त्वःफिकल धाःसा तं नं वइ । छु ईख दु वया । शंका वनी । सःतूसां मजिउ । मसःतूसां मजिउ । मन धइगुया छुं ठेगान मदु खनी । थ्वइत लुधंके अःपू मजू । यायाः थें मजिउ । जिं बिचाः याये ।

भ्वय् वनेगु । न्ह्याइपुगु ज्या । साःसाःगु नयेगु । मनूत नापलायेगु । खँ ल्हायेगु । भ्वय्या माहौल आनन्ददायक जुइ । उकिं हे मखा मनूतसें 'भ्वय् नकेगु मखुला' धकाः धाइगु । भ्वय् न्यायेकेगु उत्सव जुइ । थ्वया थःगु हे रौनक दइ । तर जिगु अनुभव पाः । गुलिथाय् भ्वय् वने । आनन्द काये फइ मखु । जेलय् लाःगु थें जुइ । भ्वजय् वने । गबलें नये सिधयेके । बिसिउँ वये थें जुइ । च्वंतले नुगः कय्कुनाबी । विशेष यानाः भ्वय् वनाथाय् म्हसिउपिं मन्त कि थथे जुइ । भ्वय् थुवाःतय् वृत्ति व्यवसाय घेराया प्रतिबिम्ब भ्वजय् खनेदइ । गनं व्यापारितय् उपस्थिति अधिक जुइ । गनं जागिरदारत । थःगु लाइनया मनूत दइ मखु । थः पृथक खनेदइ । पासा दइ मखु । ई छ्याये थाकुइ । भ्वय् नये । ताप जुइ । ह्वःता पियाच्वने । भ्वय् न्ह्याइपुइगु पलेसा उकुसमुकुसया क्षण जुयाबी । भ्वय् नयेगुया अवसर जक मखु । म्हसिउिपं मन्त कि भ्वय्या वातावरण कारागार जुइ । जिं तक्वः अनुभव याये नं ।

मनूतसें धाइ ससलय् भ्वय् वने न्ह्याइपु । फूर्ति पिहां वइ । मान हे छगू जुइ । जिजाभाजुया बिस्कंया आकर्षण दइ । थ्व खँय् जिगु अनुभव अःखः । ससः खलकय् भ्वय् वने नं जितः उलि लःलः मधाः । तीव्र औपचारिकता । स्वतन्त्र खुल्ला जुइ फइ मखु । अथे हे श्रीमतीया पासापिंथाय् भ्वय् वने नं उतिकं हे थाकु । म्हां धाये । समस्या कने । श्रीमतीं हाथ्या बी । ''छिकपिनि पासापिंथाय् भ्वय् वनेबलय् जितः नं समस्या जू । जिं म्हाये धाये दु ला ?'' 'छं जितः त्वःते दइ मखु अले जक वये ।' श्रीमतीयात कबूल याके । भ्वय् वनाथाय् म्हसिउपिं चूलाःसा जिल । मखुसा तुति हे थातय् लाइ मखु । गय् यानाः मुक्ति काये थें जुइ । मिछंगु परिस्थितिइ भ्वय् तनाव जुयाबी… । न्हूपिं मनूतलिसे तत्क्षण स्वापू विकास याये मफुगु जिगु कमजोरी खः । जिं सिउ । थ्व कारणं अनेक परिस्थितिइ जिं थःत याकःचा तायेके । मतिइ लुइ जि नं नेता जूसा गुलि जिउ । म्ह सिउसां म्ह मसिउसां खँ जुइ । न्ह्याम्हलिसे नं भेलय् पुने फइ । सइ ।

फुक्क भ्वजय् जिं मछिं, याकःचा तायेका । अथे मखु । तसकं हे छिंगु खुल्ला चकंगु नुगलंनिसें सहभागी जुयागु भ्वय् नं दु । जिगु ख्यः साहित्य । विशेषतः नेपालभाषाया । नेपालभाषाया साहित्यकारत दुगु भ्वजय् जितः भ्यलय् पुने अःपु । सहज । स्याःन्याःपिं परिवार दुने लाःगु अनुभव जुइ । थुगुसी थुज्वःगु भ्वय् जिं तःक्वः ब्वति कायेखन । सत्यमोहन दाइया स्वक्वःगु जंक्व भ्वय् । फणीन्द्र बज्राचार्यया जंक्व भ्वय् । सुरेश प्रधानया अबुया जंक्व भ्वय् । नरेशवीर शाक्यजुया अबुजुया जंक्व भ्वय् । नेपालभाषासेवी साहित्यकारतय् जमघट जुयाबी थुपिं भ्वजय् । तसकं अनुकूल न्ह्याइपुगु वातावरणय् ब्वति कयागु अनुभव जुइ ।

भाजु शाक्य सुरेनया कायया इहिपा भ्वय् ला ऐतिहासिक घटना जुया बी जिगु निंतिं । बसन्तपुरय् न्हूदँ हनाच्वनागु अनुभव बी व भ्वजं । नेपालभाषाया लेखकतय् पहाड हे ल्ह्वनाहःगु दु अन शाक्य सुरेनं । भान जुइ । थन भ्वय् नयेगु नकेगु खँ मखु । भाजु शाक्य सुरेनजुया नेपालभाषा च्वमिप्रतिया स्मरण दृष्टि छु गय् स्पष्ट जुइ । विशुद्ध नेपालभाषामय भ्वय् खः व । भ्याःभति हे मिछं तायेकेम्वाः । म्हसिउपिं मदयाः कात्तुमत्तु काइबलय् भ्वय् नइ थें च्वनीमखु । थःगु ख्यःयापिं लिसें च्वने । आकाशय् ब्वयाच्वंम्ह झंगः थें जुइ । स्वतन्त्र जूगु अनुभव जुइ । तनाव शून्य ।

शाक्य सुरेनया कायया ब्याहा भ्वय् । मेगु आकर्षणया अनुभूति नं जुइ । शाक्य सुरेनया काय शाक्य । ब्याहा याम्ह मय्जु स्यस्यः । थ्वइत अन्तर्जातीय विवाह धाये मजिउ । निखलः नं नेवाः । नेवाःया हे ला हि । पाःगु धर्म धाइ । धर्म दर्शनया थःगु हे थाय् दइ । महत्व दइ । सकारात्मक मानवीय पक्ष दइ । तर गबलें धर्म तत्व मानवीय कमजोरी नं जुइयः । थ्वइत छ्यलाः दुर्नियतीतसें मनूतय् हार्दिकतायात क्षत-विक्षत यानाबीफु । नेवाःतय् एकता तछ्याईपंसं संवेदनशील विषययात संकाबी । स्यंका बी । असमझदारी थनी । होश यायेमाःगु पक्ष जुइ । शाक्य काय स्यस्यः भौ । नेवाः दथुइ पारिवारिक सामाजिक हार्दिकता थनेगु कडि जुयाबी थ्व । नेवाःतय्त विभाजित याइगु अनावश्यक भू थुकिं चीकी । शाक्य सुरेनयात थ्व खँय् बधाइ बी ।

'भ्वय् नकेगु मखुला ?' थौंकन्हय् सकसितं मिखा तिस्सिनाः महायेका । भ्वय् याउँक नयेदःसा जक भ्वय् जुइ । नत्रसा…

More Stories Like this