थौं हानं बिस्कं बिस्कं निगः बस दुर्घटना, प्यम्ह सित
वीपी राजमार्ग अर्न्तगत सिन्धुलीया झाँगाझोली-६ रेठ्ठीइ बिहीवाः छगः बस दुर्घटना जुयाः पीछम्ह सीगु कन्हय् कुन्हु हानं मेगू निगः बस दुर्घटना जुयाः प्यम्ह सीगु दु ।
शुक्रवाः पोखरां वीरगञ्ज वयाच्वंगु ना. ३. ख. ४५१६ नम्बरया यात्रुबहाक बस बाराया पिपरा सिमरा गाविसय् दुघर्टना जूगु खः । अत्याधिक गतीइ दुगु उगु बसं सिमराया मुख्य मार्गय् दिकातःगु ना. ४. ख. ४१९ नम्बरया ट्रकयात ठक्कर बिइवं दुर्घटना जूगु खः ।
दुर्घटनाय् लानाः झिंगुदँया विवेक श्रेष्ठ व झिंप्यदँया राजधानी श्रीवास्तव सीगु दुसाः न्हय्म्ह घाःपा जूगु दु । घाःपा जूपिंत वीरगञ्जय् च्वंगु नारायणी उप क्षेत्रीय अस्पतालय् वासः याकातःगु दु । घाःपा जूपिं मध्ये निम्हेसिया अवस्था गम्भीर जूगुलिं यलया बीएनबी अस्पतालय् भर्ना याःगु दु ।
अथेहे बाराय् हे शुक्रवाः मेगू छगू नं बस दुर्घटना जुयाः निम्ह सीगु दुसाः नीप्यम्ह घाःपाः जूगु दु । कलैया वीरगाज सतक खण्ड अर्न्तगत सिसहनिया चुक नापसं ना. ३. ख. २१०६ नम्बरया बस दुर्घटना जूगु खः । दुर्घटनाय् लानाः बाराया न्यय्च्यादँया मंसुर अलाम व भारतया बिहारय् छेँ जुम्ह अवधेश ओझा सीगु दु ।
