रक्षा व भूमिसुधार मन्त्रीयात बर्खास्त यायेत माग
प्रतिपक्षी दलतय्सं रक्षा मन्त्री शरदसिंह भण्डारी व भूमिसुधार मन्त्री प्रभू शाहयात तत्काल बर्खास्त यायेत माग यासें व्यवस्थापिका संसदया मुँज्या अवरोध याःगु दु ।
बिहीवाः च्वंगु मुँज्याया विशेष इलय् न्ववासें प्रतिपक्षी नेपाली कांग्रेस, नेकपा (एमाले) व चिधंगु दलया नेतातय्सं देय् टुक्रा यायेगु अभिव्यक्ति बिउम्ह रक्षा मन्त्री भण्डारी व काशी तिवारीया हत्या काण्डय् प्रहरीं दोषी धकाः द्वपः बिउम्ह भूमिसुधार मन्त्री शाहयात मन्त्रिमण्डलं चीकेत माग याःगु खः ।
संसदय् न्ववासें कांग्रेस संसदीय दलया नेता रामचन्द्र पौडेल, एमाले नायः झलनाथ खनाल, कांग्रेस नेता डा. रामशरण महत लगायतं निम्ह मन्त्रीतय्त बर्खास्त मयातल्ले संसदया मुँज्या न्ह्याकेमबिइगु धयादिल । नेतातय्सं निम्ह मन्त्रीत नापं भुखाचं पीडिततय्त सरकारं आः तक राहत बिइमफुगु खँय् प्रधानमन्त्री डा. बाबुराम भट्टराईं संसदय् लिसः बिइमाःगु माग नापं याःगु खः ।
अथेहे मुँज्याय् माओवादी प्रवक्ता दिनानाथ शर्मां थःपि काशी तिवारीया हत्यारायात कारवाही यायेमाःगु पक्षय् दुगु धयादिल । तर वय्कलं उगु घटनाय् मन्त्री शाहया नां स्वाकाः राजनीतिकरण मयायेत इनाप नं यानादिल ।
