वा उत्पादन माग स्वयां कम जुइगु

येँ(सन्ध्या टाइम्स)/नेपालय् वा उत्पादन निरन्तर रुपं कुहां वयाच्वंगु छगू सर्वेक्षणं क्यंगु दु। सन् २०३० यात अन्त तकया दुने वाया माग कुल घरेलु उत्पादन स्वयां निदुगं अप्वः जुइगु नं सर्वेक्षणं क्यंगु दु।
खाद्य नीति अनुसन्धान संस्थां सन् १९९५ निसें २००८ तकया दुने उपलब्ध तथ्यांकयात लिधंसा कयाः याःगु अध्ययन लिपा थुगु रिपोर्ट पिथंगु खः। नेपालय् मुख्य यानाः उत्पादन जुयाच्वंगु वा, कःनि, छ्व आदिया उत्पादन नं २०३० या अन्त तकया दुने आपालं कुहां वइगु नं संस्थां थःगु रिपोर्टय् न्ह्यथंगु दु।
संस्थां सार्वजनिक याःगु रिपोर्टयात 'आशावादी दृश्य विवरण' व 'निराशावादी दृश्षविवरण' धकाः निगू ब्वय् नं ब्वथलातःगु दु। थुकी मध्ये आशा वादीया ल्याखं स्वयेगु खःसा झिंच्यादँ लिपा नेपालय् वाया उत्पादन माग स्वयां पीछगू प्रतिशत म्हो जुइगु नं प्रतिवेदनय् न्ह्यथनातःगु दु।
प्रतिवेदनय् वा उत्पादन म्हो जूगु मध्ये छगू कारण रासायनिक मलया स्यना वनाच्वंगु अवस्थायात नं क्यना तःगु दुसा वितरण प्रणाली नं छगू प्रमुख कारकतत्व जूगु संस्थाया प्रतिवेदनय् न्ह्यथनातःगु दु। नेपाःया खाद्य असुरक्षाया ध्यानय् तयाः संस्थां उगु रिपोर्ट तयार यानाः सार्वजनिक याःगु खः।
तुलनात्मक रुपं वा उत्पादन स्वयां कःनि व छ्वया उत्पादन धाःसा सन्तोष जनक जूगु प्रतिवेदनय् धयातःगु दु। यदि रासायनिक मल वितरण प्रणाली सुधार याना यंकेगु खःसा थुकिं स्थिति बांलाना वनाः वा उत्पादनय् नं बांलाःगु सुधार जुइगु प्रतिवेदनय् न्ह्यथनातःगु दु।
तर रासायनिक मल वितरणयात प्रभावकारी ढंगं न्ह्याकेया निंतिं नीतितहय् विकल्पत दुगु खःसां व सीमित जुयाच्वंगु व आयातया निंतिं विश्व बजारया भरय् च्वनेमाःगुलिं याकनं सुधार जुइगु सम्भावना खने मदुगु नं प्रतिवेदनय् धयातःगु दु।