
एनआरएन सम्मेलनया खर्च करोडौं
येँ (सन्ध्या टाइम्स)/निदँय् छक्वः जुइगु गैरआवासीय नेपाःमितय् सम्मेलन म्हिगःनिसें येँय् सुरु जुल। थुगुसी जूगु थ्व सम्मेलन न्याक्वःगु खः। गैरआवासीय नेपाःमि (एनआरएन) तय्सं निदँय् छक्वः थःगु देशय् वयाः थज्याःगु सम्मेलन याइ। थज्याःगु छगू सम्मेलन यायेत थ्व संस्थां निन्हुया दुने लखौं तका खर्च याइगु खँ सीदुगु दु।
संघया सूत्रं धाः कथं निदँ न्ह्यः प्यक्वःगु सम्मेलन याःबलय् संघं ९० लाख दां खर्च याःगु खः। थुगुसी थ्व खर्च बढे जुयाः छगू करोड स्वयां अप्वः थ्यनीगु अनुमान नं सूत्रं याःगु दु।
थ्व संघपाखें जक याइगु खर्च खः। संघयात थ्व सम्मेलन यायेगु लागिं नेपाः सरकारं नं २५ लाख तका अनुदान बीगु चलन दु। पिनें वइपिं प्रतिनिधित च्वनेगु, नयेगु व्यवस्था उपिं थःपिंसं हे यायेमाः। थ्व खर्चय् थुकिया ल्याः तःगु मदुनि।
सम्मेलनया झ्वलय् न्हूगु नेतृत्व ल्ययेत चुनाव नं जुइ। चुनाव जुइबलय् थःगु पक्षय् मत कायेगु लागिं उम्मेदवारतय्सं मेगु लखौं दां खर्च याइगु खँ धाःगु दु। तसकं यक्व खर्च यानाः ल्वायेमाःगु चुनाव जुयाः थुकी विदेशय् टन्न ध्यबा कमे याये धुंकूपिं एनआरएनतय्सं जक उम्मेदवारी बीगु याइ। थ्व संस्थाय् खाडी मुलुकय् ज्या याइपिं नेपाःमित नं दुजः जुयाच्वंगु दुसां चुनावय् उमिगु ज्या धाःसा मुश्किलं भोट कुकर्गु छगू जक जुइगु खँ नं सूत्रं धाःगु दु।
संघया दुजः जुइगु लागिं खाडी मुलुकय् ज्या याइपिं नेपाःमितय्सं ५० डलर पुलेमाःसा युरोप व अमेरिकाय् च्वनाच्वंपिं नेपाःमितय्सं १०० डलर शुल्क पुलेमाः। संघयात प्रत्यक्ष वइगु शुल्क थ्वहे जक खः।