प्रहरीं ज्याझ्वः पनेवं ग्वसाः दुजःयात हृदयाघात
येँ(सन्ध्या टाइम्स)/काभ्रेया फूलबारी लागाय् जुइत्यंगु छगू अन्तर्राष्ट्रिय महोत्सवयात प्रहरीं पना बीवं ग्वसाः खलःया छम्ह दुजः ह्दयाघात जुयाः मंत।
येँया बल्खुइ च्वंम्ह ३३ दँया दीपेश बुढाथोकी धुलिखेल अस्पतालय् वासः याकु याकुं थौं सुथय् मदुगु खः।
इभेन्ट म्यानेजमेन्ट कम्पनी पार्टी नेपालया ग्वसालय् मंगलवाःनिसें स्वन्हुयंकं जुइगु 'शान्ति जात्रा अर्गानिक फेस्टिभल' नांगु ज्याझ्वः याये दइ मखु धकाः म्हिगः बहनी निसःम्ह ति प्रहरी पना बिउगु खः। थुकिं यानाः अन्तर्राष्ट्रिय पाहांपिनि न्ह्यःने थःपिनि बेइज्जत जुइन धकाः आँटे चाःम्ह बुढाथोकीयात अन हे ह्दयाघात जूगु खः।
संगीत, कला व अर्गानिक फुडयात बः बीगु ताः तयाः जूगु उगु ज्याझ्वलय् फ्रान्स, स्वीट्जरल्यान्ड, म्यासेडोनिया, अस्ट्रिया आदि देय्या संगीतकर्मी, कलाकार व डिजेत सहभागी जुयाच्वंगु दु। ग्वसाः खलकं गृह मन्त्रालय व स्थानीय प्रशासनयाके स्वीकृति कयाः हे ज्याझ्वः यानागु दावी याःगु दु।
