लडाकु व अयोग्य लडाकु दथुइ ल्वापु

येँ(सन्ध्या टाइम्स)/अनमिनं प्रमाणीकरण यायेधुंकाःलि अयोग्य धकाः शिविरं पिने छ्वःपिं माओवादीया लडाकु व सुर्खेतया दशरथपुर लागाया छैठौं डिभिजनय् दुपिं लडाकुतय् दथुइ म्हिगः बहनी ल्वापु जुल।
अयोग्य लडाकुत जबर्जस्ती शिविरय् दुहां वनत्यंगु इलय् उगु ल्वापु जूगु खः। थ्यंमथ्यं ५० म्ह अयोग्य लडाकुतय्सं शिविरय् दुहां वनेगु कुतः यायेवं सुरक्षाया नितिं च्वनाच्वंपिं माओवादी सेना व उमि दथुइ ल्वापु जूगु खः।
विदेशीतय्गु इशाराय् थःपिंत बलजफ्ती पितिना छ्वःगु खः धासें उपिं थःपिं नं शिविरय् हे च्वने दयेमाः धइगु माग यानाः शिविरय् दुहां वयेगु कुतः याःगु खः।
अयोग्य प्रमाणित जुइधुंकूपिं लडाकुयात शिविरय् दुकायेगु जुइ मखु धकाः गेटय् हे पना बिउगु खँ शिविरया डिभिजन कार्यालयया बिग्रेड कमाण्डर तारां धयादीगु दु।
अयोग्य जुइधुंकूपिं पासापिंत शिविरय् तयेगु सम्झौताया अःखः जुइगु जुयाः उमित दुमकयागु खँ नं तारां कनादिल।
तर शिविरय् दुहां वनेगु कुतः याःपिं थ्व अयोग्य लडाकुत माओवादीया हे बरिष्ठ उपाध्यक्ष मोहन बैद्य किरण पक्षधर खः व उमिसं सुर्खेतया इन्चार्ज कृष्ण धमलाया निर्देशन कथं थ्व कुतः यानागु खँ धाःगु दु।