मोहनि हना वःपिं ३८ म्ह सित

वीपी राजमार्गय् बस दुर्घटना

छतय् च्वनावःपिं ११ म्ह तिंन्हुयाः बचे जुल

येँ (सन्ध्या टाइम्स)/सिन्धुलीया बीपी राजमार्गय् छगः यात्रुवाहक बस सुनकोसी खुसिइ कुतुंवनाः ३८ म्ह मनू सित। सिन्धुलीं येँय् वयाच्वंगु ना. ३ ख ९४१२ नम्बरया उगु बस सुनकोशी खुसिइ कुतंवंगु खः। थौं सुथय् १० बजेपाखे उगु दुर्घटना जूगु खः ।

थःथःगु छेँय् मोहनि नखः हने क्वचायेकाः येँपाखे लिहां वयाच्वंपिं आपालं यात्रुत उगु बसय् च्वना वःगु खः। बसय् दुनेया सिटय् जक मखु च्वय् छतय् नं आपालं मनूत च्वना वःगु खँ धाःगु दु। खुसिइ बस कुतुं वनेवं छतय् च्वना वःपिं झिंछम्ह यात्रुत तिंन्हुयाः बचे जुइत ताःलाःगु खःसा दुने सिटय् च्वना वःपिं धाःसा फुक्क धइथें हे सीगु खः ।

बनेपा-सिन्धुली-बर्दिवास राजमार्गया खुर्कोट-नेपालथोक निर्माणाधीन सडक खण्डया झाँगाझोली-६ रिट्ठे धाःगु थासय् उगु दुर्घटना जूगु खः। बसय् अप्वः यात्रु तया हःगुलिं हे सन्तुलन स्यनाः दुर्घटना जूगु खयेमाः धकाः अनुमान याःगु दु ।

दुर्घटना लिपा प्रहरी व स्थानीय मनूत जानाः उद्धारया ज्या न्ह्याकाच्वंगु दु। उकी लानाः घाःपाः जूपिं १६ म्हेसित वासः यायेत अस्पताल यंकूगु खँ प्रत्यक्ष्यदर्शीतय्सं धाःगु दु।
घटनास्थलय् हे दुम्ह स्थानीय माओवादी गाविस कमिटीया सेक्रेटरी विनोद रायमाझीं संचारकर्मीतय्त जानकारी बिउ कथं घटनास्थलय् हे सीपिं ३८ म्हेसिया लाश लिकायेधुंकूगु दु। इमिगु लाश आः सुनकोशी खुसि सिथय् तयातःगु दु। सीपिं मध्ये बस चालक प्रेम तामाङ छम्हेसिया जक सनाखत जुइधुंकूगु दुसा मेपिंत म्हसीकेगु कुतः जुयाच्वंगु दनि ।

दुर्घटना जूगु बसय् ५० म्ह सिबें अप्वः यात्रु च्वना वःगु दयेमाः धकाः अनुमान याःगु दु। येँय् वयेगु उगु राजमार्ग तसकं चिबाला। थुगु बस नं अथे चिबालागु थासं क्वय् कुतुं वंगु खः। दुर्घटना बारे पूवंक जानकारी वयेगु क्रम जारी हे दनि ।