माधव नेपालया नौटंकी

कृष्ण प्रजापित
देशय् अन्तत स्वंगूगु तःधंगु राजनीति पार्टी नेकपा एमालेया बरिष्ठ नेता माधवकुमार नेपाल प्रधानमन्त्री जूगु दु । न्हापांनिसंे छगू हे जक ध्यानमग्न जुयाः वय्कः प्रधानमन्त्रीया लािगं प्रकि्रया पुवंकादीधुंकूम्ह नेता खः । वय्कलं छगू इलय् ला थः मां मदुगु बर्खी तकं मच्वँसे प्रधानमन्त्री जुइत शुटकेशय् लंसुरुवाः तयाः दरवारं सःती ला धकाः पीगु ज्या तकं यानादीगु खः । आखिर उगु इलय् असक्षम धकाः जुजु ज्ञानेन्द्रं घोषणा यानातःम्ह शेरबहादुर देउवायात हे पवित्र जल छ्वाकाः हाकनं प्रधानमन्त्री नियुक्ति यानाबिल । थुकथं देशय् प्रतिगमन कालंनिसें हे जुजुया प्रतिगमनकारी प्रधानमन्त्री जुइत तकं तयार जुयाः जुजुयात पाँय्म्वहः देछानाः विवादय् वयाच्वंम्ह कम्युनिष्ट नेता थौं प्रधानमन्त्री जूगु दु ।

पुँजीवादी व्यवस्थाय् मन्त्री प्रधानमन्त्री जुइगु तःधंगु खँ मखु । बरु उगु व्यवस्था देशवासीयात गुकथं चित्त बुझे जुइक सेवा यायेत स्वइ धइगु मू खँ खः । देशय् न्ह्यागु हे सरकार वःसां आखिर नेपाली जनतां न्हिया न्हिथं नये माःगु नये खं कि मखं व त्वनेगु त्वने खं कि मखं धइगु मूल सवाल खः । तर गुला तक एमाले शासनकालय् उपप्रधानमन्त्री जुइधुंकूम्ह मनूयात हाकनं छक्वः देशया शासन सत्ताय् वनेगु ह्वःताः चूलाःगु दु । व चिठ्ठा लाःगु थें जक जुयाच्वंगु दु । माधवकुमार नेपालयात वयागु योग्यता क्षमता व अनुशासन- यात मूल्यांकन याना स्वयेगु खःसा शेरबहादुर गथे जुजुं असक्षम धाःसां सक्षम जुयाः प्रधानमन्त्री तुं जूवःगु खः आः प्रधानमन्त्री जुयाच्वंम्ह माधवकुमार नेपाल नं अथे हे नेपाली जनतां निगू निगू थासं बुकाः नं हाकनं राजनीतिक दलतय्गु सहमतिइ प्रधानमन्त्री यानाहःगु कारणं असक्षम प्रधानमन्त्री मध्ये नं चिठ्ठां लाःम्ह प्रधानमन्त्री हे खः ।

मनूया क्षमता योग्यता धइगु दबुली थहां वनाःलि हे तिनि क्यने फइगु खः वा खने दइगु खः । माधव नेपाल छगू इलय् बैंकय् स्टोरकिपरया ज्या याइम्ह धाइ । उगु इलय् वयाके उलि टेन्सन नं मदयेफु । तर आः थीथी राजनीतिक पार्टीं थःिपंत क्वःथलीगुनिसें छु याइ गथे याइ धइगु चिन्ता अप्वयाच्वंगु जुइफु । अथे जुयाः राजनीतिक नेतातय्गु भाषण वक्तब्य व उमिगु आश्वासनया भरय् म्वाइपि सर्वसाधारण नेपाली जनता हाकनं छकः थारान्हुया च्वनेमाःगु स्थिति दु । सामान्यतया मनूत थःगु क्षमता व योग्यतां हे गनं गन थ्यनीगु खः । तर गबलें गबलें धाःसा मेपिनि अपमानं नं मनूत छगू थासं मेगु थासय् थ्यनी । माधव नेपाल अज्याःम्ह हे व्यक्तित्व खः । अथे धइगु तपाःलं सुरुवाः ज्वनाः पियाच्वगु इलय् मांया बर्खी मच्वंगु इलय् व जुजुया पालिइ दां छायाः जूगु इलय् वयागु नियत थुइकाः संविधानसभाया चुनावय् स्वनिगः व स्वनिगलं पिनेया नेपाली जनतां एमालेया शीर्षस्थ नेता माधवकुमार नेपालयात बहिष्कार यानाः संविधानसभाया चुनावय् बुका बिउगु खः ।

थथे गाक्क बेइज्जती कमे याये धुंकूम्ह माधवकुमारयात थःगु पदय् च्वनाच्वनेत मछालापुसे च्वनाः जुइ सविधानसभाया चुनाव लिपा वय्कलं थःगु पदं राजीनामा बियादिल । पार्टीया जिम्मेवार पद महासचिवं राजीनामा यानाः सन्यासी जुयाच्वंम्ह माधव नेपालयात हाकनं एमालेया हे छम्ह सभासदं थःगु सभासद् पद बली बियाः संविधानसभाय् छ्वयाहःगु खः । हाकनं वयागु असक्षमता सक्षमताय् परिणत जूवन । थौंकन्हय् धाःसा हाकनं अध्यक्ष पदय् त्याकावःम्ह झलनाथ खनाल स्वयाः च्वय्या पदय् यंकाः प्रधानमन्त्री जूवंगु दु । सामान्य बहुमत सदनय् प्रधानमन्त्री ल्यइगु प्रतिकि्रयाय् प्रतिद्वन्द्वी मदयेवं हे वय्कः निर्विरोध निर्वाचित जुयादिल । थथे मनू गनं गन यनेफु व असामान्य अवस्थाय् लायेधंकूम्ह मनू तकं थासय् यनेफु धइगू ज्ञान माधव नेपालया जीवनचक्र खने दयावःगु दु । नेपाली जनतां अपेक्षा यानातःिपं मनूत धाःसा थौं ध्याकुनय् लालां वनाच्वंग दु । अज्याःगु थीथी समस्याया कारणं यानाः थौं स्वम्हम्ह कम्युनिष्ट प्रधानमन्त्री धाःम्ह माधव नेपाल नं छम्ह जोकर साबित जुइगु निश्चित दु । छाय्धाःसां वय्कःया सरकार थौं क्वःदली ला कन्हय् क्वःदली ला ठेगान मदुनि ।

एमालेया अल्पमतया सरकारया पालाय् शेरबहादुर देउवायात अयोग्य हे खःसां अबलय् भाग्यबस प्रधानमन्त्री जुइगु ह्वःताः चूलाःगु खः । अथेहे थौं दकलय् तःधंगु दल खयां नं माओवादीया अल्पमत सरकार क्वःदःगु कारणं स्वंगूगु तःधंगु दलया नेता नेपाल प्रधानमन्त्री जूवंगु दु । पार्टी अधिवेशनय् थः त्याइ धइगु ग्यारेन्टी मदयेवं थःगु मत के।पी। ओलीयात समर्थन यानाः नं के।पी। ओली बूगु कारणं पार्टी- पाखें हे वयात मर्यादित वरिष्ठ नेताया पद बियाः ज्या याकातःगु कारणं वयात थौं थुगु प्रधानमन्त्रीया ह्वःताः चूलाःगु खः । वास्तवय् निगू थासं बूम्ह मनूयात प्रधानमन्त्री यायेगु धइगु ला नेपाली जनताया बेइज्जत हे खः ।

राजनीति थुइकां थुइके मफइगु विषय खः धइगु हाकनं छकः प्रमाणित जूगु दु । सम्पूर्ण नेपाली जनतां हे थौं गणतन्त्र व स्वशासनयात माने यानाच्वंगु इलय् गणतान्त्रिक प्रधानमन्त्री जुइखंगु माधव नेपालया िनंितं सकारात्मक पक्ष हे खः । तर थुगु राजनीतिक गठबन्धन माय्का थंे बल्लाःगु मखुसंे कचिका थें तीजक जक साःसां थुसुक्क चबुइ फुगु गठबन्धन खः धइगु सीदु । छगू हे राजनीतिक पार्टीया नेतृत्वय् चले यायेत स्वःगु बहुमतया सरकार ला ताः ई टिके मजुइगु झीगु नेपालय् मेमेगु पार्टीया समर्थनं जक थः च्वय् वनेत स्वयाच्वंगु कारणं मेिपंसं ल्हाः लिकया बीवं थुगु सरकार क्वःदलीगु निश्चित दु । थौं एमालेयात व हे जक ग्याःचिकुं लितुलिनाच्वंगु दु । सामान्य बहुमतं जक त्याकूम्ह प्रधानमन्त्री जूगु कारणं आः छु जुइ अले छु जुइ धइगु मतिइ ततं हे गाक्क ज्या याये मफइगु जयाच्वन धइगु नं कन्हय् सीदइ तिनि । थथे ग्याग्यां प्रधानमन्त्री जुयाच्वनेगु स्वयां निर्धक्क न्हापा थंे हे ताः ई तक प्रमुख प्रतिपक्षीया भूमिकाय् च्वनेगु हे माधव नेपालयात कल्याण जुयाच्वंगु खः । तर आः वयाः जिम्मेवार पदय् च्वनाः ज्या यायेमाःगु कारण्ंा झीत माःगु अधिकारया लािगं हाकनं आन्दोलित जुइमाःगु स्पष्ट संकेत खने दुगु अवस्था ब्वलनाच्वंगु दनि ।

More Stories Like this