क्व: [चिबाखं]

विराज कायस्थ

जि सिइ धुंकम्ह । छं स्याःगु खः जित: । जि छम्ह लाश । जि निष्प्राण लोहँया मुर्ति । जि कुचा-कुचा जुयाः छंगु देय् स्वयां यक्व तापाक्क अनकन्तारय् छ्याला-ब्याला जुयाच्वना - भ्या: भतिचा हे छंगु आश मकासें । तर छं जित: स्या:सां जिगु मतिनायात स्याये मफु । छन्हु छ ब्वया वल, यइपुस्ये च्वंम्ह झंग जुया । छं जिगु छक्वः कुचा यंका छंगु कःसि च्वंगु लः भतिचा दुगु धम्पलय् क्वफ्वात । जि तसकँ लयता -

छंके जिगु माया-मतिना ह्वया वल धका,
छंके नं नुगः दु धका,
छ आखिर जिम्ह हे प्राण धका

छं साप हे बः यात । छं जिगु छक्व हे कुचा त्वःमफिक । जित मतिनां जाःगु छंगु म्हुतुइ तया छं ब्वयका यंकल, छंगु धम्पतय् मुने यन । छंगु कुतः खंखं जिके छंगु माया झन् अप्वया वल । जिगु लाचारी खनां जित: मछिंका ग्लानी जुल । अयसां जि लय्ता । छं जित: द्यः धका भा:पिल, छं जित: थ: धका नालाकाल ।

छन्हु आकांझाकां जिं खनाः - आः ला जि अनकन्तारय् मखुत खनी । जिगु दक्व कुचा ला व हे धम्प दुने मुने धुंकल खनी । छं जिके हाकनं प्राण दया व थें जुल । जि आः बाय् मलुम्ह मखुत । जि आः व धम्प दुने छथाय्सुं दु ।

जिगु छ्योँ द्यने लः नं भतिचा दु । व लः या अस्तित्व याःगु तात्पर्य थुइकेगु कुतः जिं मयाना । बस जि लय्ता ।
छन्हु हाकनं मखु थें जुल - जि लय्ताया च्वनागु इलय् छ वल । छंगु ख्वालय् ब्याक्कं सन्तोष दु । छं जित: चुप्पा नयत छ्यो क्वछुकल । तर छु जूगु थ्व ? छं ला लः फुक्कं त्वनः, थःगु प्याचा लंकल अलय् अत्तापत्ता मदय्क छ ब्वयावन ।

हरे जिं गथे मथुगु जुइ छंगु प्रपन्च ?
गथे म्हःमस्युगु जुइ छ क्वः यात ?

More Stories Like this