सहमतिया लिक्क थ्यंपिं माओवादी-कांग्रेस

नकतिनि जूगु माओवादी व नेपाली कांग्रेसया नेतातय् संवादं शान्ति प्रक्रिया व संविधान च्वज्यायात न्ह्यःने यंकेगु आपालं खँय् सहमति जूगु दु। खतुं माओवादीलिसे नेपाली कांग्रेस व एमालें थज्याःगु सहमति थ्व स्वयां न्ह्यः नं आपालं यायेधुंकूगु खः। तर उकिया इमान्दारीपूर्ण पालना धाःसा मजू। जुइ धुंकूगु सहमति पालना मजूगु खँय् छम्हं मेम्हेसित द्वपं बीगु ज्या जक जुल। गुकिं यानाः दलतय् दथुइ झन जक अविश्वास ब्वलंकेगु ज्या जू वन। उकिं आःया पालय् नं अज्याःगु दुर्घटना मजुइमा धकाः सहमति याःपिं दलत व उकिया नेतात सतर्क जुइगु पाय्छि हे जुइ। यदि शान्ति व संविधान च्वज्याया ज्यायात न्ह्यःने यंकेगु खँय् धाथें इमान्दार जुइगु खःसा माओवादी नं सेना समायोजन याउँक यायेत सहमत जुइगु व कांग्रेस नं राज्य पुनर्संरचनाया ज्यायात निकास बीत तयार जुइगु खँ पिदंगु दु। वास्तवय् शान्ति प्रक्रिया सेना समायोजनया खँय् व संविधान च्वज्या राज्य पुनर्संरचनाया खँय् थानाच्वंगु खँ सकस्यां सिउ। अले थ्व मुद्दाय् दकलय् तःधंगु मतभेद जुयाच्वंगु नं माओवादी व कांग्रेस दथुइ हे खः। आः थ्व निगू दलतय्सं हे थुपिं विषयय् मतभेद ज्यंकेगु धकाः सहमति याःगुलिं याकनं निकास लुइ धकाः आशा यायेगु थाय् नं ब्वलंगु दु। खतुं कांग्रेस व माओवादी दथुइ जूगु सहमतिं थःपिंत ब्यागलं लाकेत स्वल धकाः मेगु तःधंगु दल एमालें शंका प्वंका हःगु दु। निगू दलया दथुइ सकारात्मक व निकास लुइगु कथं सहमति जूगु खःसा उकी सुनां नं शंका वा आपत्ति प्वंकेमाःगु आवश्यकता मदु। अय्नं थज्याःगु मामिलाय् फुक्कं दलया सहमति काये फुसा व बांलाः हे जुइ ।

More Stories Like this